बैतडी – दशैँ तिहारको अवसर पारेर बैतडीको शिवनाथ–२, फट्केढुङ्गामा ‘फट्केढुङ्गा प्रिमियर लिग – पिपिएल’ को पहिलो सिजन आयोजना हुने भएको छ।
भुमिराज युवा क्लब, फट्केढुङ्गाले आयोजना गर्न लागेको गाउँपालिकास्तरीय खुल्ला पुरुष क्रिकेट प्रतियोगिता असोज १९ गतेदेखि २१ गतेसम्म सञ्चालन हुनेछ।
प्रतियोगितामा सहभागी हुन चाहने इच्छुक टिमहरूले असोज १७ गते बेलुका ८ बजेभित्र आफ्नो टिम दर्ता गराउन सक्नेछन्। टिम दर्ता शुल्क ३००० रुपैयाँ तोकिएको छ।
भुमिराज युवा क्लबका सचिव अनिल सिंह साउद (एके) का अनुसार प्रतियोगिताको विजेताले २०,००० रुपैयाँ नगद, ट्रफी, मेडल र प्रमाणपत्र प्राप्त गर्नेछ। त्यसैगरी, उपविजेताले १०,००० रुपैयाँ नगद सहित मेडल र प्रमाणपत्र पाउनेछ। प्रतियोगिताभर उत्कृष्ट प्रदर्शन गर्ने ‘म्यान अफ द टुर्नामेन्ट’ खेलाडीलाई १,००० रुपैयाँ नगद, ट्रफी, मेडल र प्रमाणपत्र प्रदान गरिनेछ।
आयोजकले प्रतियोगितालाई मर्यादित र अनुशासित बनाउन केही नियमहरू तय गरेका छन्। प्रत्येक खेल १० ओभरको हुनेछ र सबै खेल टेनिस बलले खेलाइनेछन्। खेलाडीहरूले जर्सी र जुत्ता अनिवार्य लगाउनुपर्नेछ।
प्रतियोगिताको मुख्य उद्देश्य ‘थ्रो बल रहित खेल’ भएकाले थ्रो बल पूर्णतया निषेध गरिएको छ। अम्पायरको निर्णय अन्तिम हुनेछ र विवाद आएमा आयोजकको निर्णय नै मान्य हुनेछ। टिममा गाउँपालिकाबाहिरका अधिकतम २ जना खेलाडी राख्न पाइनेछ।
खेलहरू आईसीसीको नियमअनुसार खेलाइने भए पनि एलबी डब्लु (LBW) को नियम भने लागू हुने छैन। खेलका लागि आवश्यक परिचय खुल्ने प्रमाणपत्र अनिवार्य ल्याउनुपर्नेछ।
Discussion about this post