काठमाडौं । बङ्गालको खाडीमा विकसित हुने न्यूनचापीय प्रणालीको प्रभावले आगामी साताको अन्त्यमा देशका विभिन्न भूभागमा वर्षा र हिमपात हुने सम्भावना रहेको मौसम पूर्वानुमान महाशाखाले जनाएको छ। यससँगै देशका विभिन्न स्थानमा तापक्रम घटेर चिसो बढ्न सक्ने अनुमान गरिएको छ।
मौसमविद् राजन महर्जनका अनुसार साताको सुरु र मध्यमा पश्चिमी वायुको आंशिक प्रभाव रहनेछ भने अन्त्यतिर न्यूनचापीय प्रणालीको प्रभाव देखिनेछ।
साताको अन्त्यमा कोशी, बागमती र गण्डकी प्रदेशका हिमाली क्षेत्रमा मध्यमदेखि भारी हिमपात हुन सक्नेछ। लुम्बिनी, कर्णाली र सुदूरपश्चिमका हिमाली क्षेत्रमा पनि हिमपातको सम्भावना रहेको छ।
त्यस्तै, पहाडी क्षेत्रमा साताको अन्त्यमा मध्यम वर्षा हुन सक्नेछ। कोशी, बागमती र गण्डकी प्रदेशका केही स्थानमा भारी वर्षाको सम्भावना रहेको मौसमविद् महर्जनले बताएका छन्। तराईका विभिन्न क्षेत्रमा पनि साताको अन्त्यतिर वर्षा हुन सक्ने अनुमान गरिएको छ।
मौसमविद्का अनुसार आगामी साता देशका विभिन्न भूभागको अधिकतम र न्यूनतम तापक्रम केही घट्ने सम्भावना रहेकाले चिसो बढ्न सक्छ।
Discussion about this post