काठमाडौं – भुटानको गासा जिल्लामा बिहीबार राति सिन्ताफु हिमताल फुटेर आएको बाढीले ठूलो क्षति पुर्याएको छ। बाढीले प्रसिद्ध गासा तातोपानी कुण्ड पूर्ण रूपमा बगाएको छ भने पुनाखा–गासा राजमार्गको एक भागमा क्षति पुगेको छ।
बाढीका कारण स्थानीय सडक तथा सिँचाइ प्रणालीमा समेत क्षति पुगेको छ। हालसम्म मानवीय क्षतिको खबर आएको छैन।
हिमताल विस्फोटपछि संकोश नदीमा पानीको सतह बढेको छ। उक्त नदी भुटान हुँदै भारतको पश्चिम बंगाल र असममा प्रवेश गर्ने भएकाले दुवै राज्यका सीमावर्ती क्षेत्रमा उच्च सतर्कता अपनाइएको छ।
भारतीय सञ्चारमाध्यमका अनुसार पश्चिम बंगालको अलिपुरद्वार र कुचबिहार तथा असमको धुबरी क्षेत्रमा निगरानी बढाइएको छ। सम्भावित बाढीलाई ध्यानमा राख्दै अलिपुरद्वारका १० हजारभन्दा बढी मानिसलाई सुरक्षित स्थान र राहत शिविरमा सारिएको छ।
बिहीबार राति करिब ८ः१५ बजे हिमताल फुटेको प्रारम्भिक जानकारी छ। बाढीको कारण, पानीको मात्रा र क्षतिको विवरण संकलन भइरहेको छ। उद्धार तथा विपद् व्यवस्थापन टोली परिचालन गरिएको छ।
Discussion about this post