ओखलढुंगा । बंगालको खाडीमा विकसित ‘अर्णव’ चक्रवात र पश्चिमी वायुको संयुक्त प्रभावले नेपालको हिमाली तथा उच्च पहाडी क्षेत्रमा हिमपात भएको छ। हिमपातसँगै तापक्रम घटेपछि हिमाली जिल्लाहरूमा चिसो बढ्नुका साथै जनजीवन प्रभावित बनेको छ।
मौसममा आएको परिवर्तनका कारण पूर्वी हिमालदेखि सुदूरपश्चिमका उच्च पहाडी तथा हिमाली क्षेत्रसम्म हिमपात भएको छ। सोलुखुम्बुको खुम्बु क्षेत्र, दिङ्बोचे, गोक्यो उपत्यका तथा मनास्लु र लाङटाङका माथिल्ला भूभागमा बाक्लो हिउँ परेको छ।
त्यस्तै, मनाङ, मुस्ताङ, हुम्ला, मुगु, डोल्पा, जुम्ला र जाजरकोटका उच्च भूभागमा समेत हिमपात भएको छ। केही स्थानमा बाक्लो हिउँ जम्दा स्थानीयको आवतजावत तथा पर्यटकीय गतिविधिमा असर परेको छ।
सोलुखुम्बुको दिङ्बोचे क्षेत्रमा घुँडासम्म हिउँ जमेको पदयात्रीहरूले बताएका छन्। हिमपातका कारण नाम्चे बजारभन्दा माथिका पर्यटकीय क्षेत्र, सगरमाथा आधार शिविर, कालापत्थर र गोक्यो जाने पदमार्ग प्रभावित भएका छन्। कतिपय पर्यटक सुरक्षित आश्रयस्थलमा रोकिएका छन्।
मौसम प्रतिकूल बनेपछि जिल्ला प्रहरी कार्यालय सोलुखुम्बुले पदयात्रामा रहेका स्वदेशी तथा विदेशी पर्यटकलाई सतर्कता अपनाउन र सुरक्षित स्थानमा बस्न आग्रह गरेको छ।
त्यस्तै, मनाङ र मुस्ताङका प्रशासनले थोरङ ला पास, तिलिचो ताल, काङला पास र सारिबुङ पासजस्ता पाँच हजार मिटरभन्दा माथिका जोखिमपूर्ण क्षेत्रमा आगामी तीन दिन पदयात्रा नगर्न आग्रह गरेका छन्।
हिमपात, तीव्र हावा र सम्भावित हिमपहिरोको जोखिमलाई ध्यानमा राख्दै पर्यटकलाई अनावश्यक यात्रा नगर्न तथा मौसमको अवस्था बुझेर मात्र यात्रा गर्न आग्रह गरिएको छ। कर्णाली र सुदूरपश्चिमका केही हिमाली जिल्लामा सडक यातायातसमेत प्रभावित भएको छ भने हुम्लाको सिमकोट क्षेत्रमा हवाई उडान स्थगित भएका छन्।
Discussion about this post