काठमाडौं । यस वर्षको दसैँमा काठमाडौं उपत्यकामा सवारी दुर्घटना र त्यसबाट हुने मानवीय क्षतिमा कमी आएको छ। गत वर्षको दसैँमा १५५ वटा सवारी दुर्घटना हुँदा १० जनाको मृत्यु भएकोमा यस वर्ष १०५ वटा दुर्घटना भएका छन् भने तीन जनाले ज्यान गुमाएका छन्।
काठमाडौं उपत्यका ट्राफिक प्रहरी कार्यालयका अनुसार गत वर्षको तुलनामा यस वर्ष दुर्घटना ५० वटाले घटेको छ। त्यस्तै, दुर्घटनामा मृत्यु हुनेको सङ्ख्या सात जनाले कम भएको छ।
कार्यालयका प्रवक्ता एवं प्रहरी उपरीक्षक नरेशराज सुवेदीका अनुसार यस वर्ष भएका अधिकांश दुर्घटना दुईपाङ्ग्रे सवारीसाधनसँग सम्बन्धित छन्। तीव्र गतिमा सवारी चलाउँदा नियन्त्रण गुम्ने र दुर्घटना हुने गरेको उनले बताए।
ट्राफिक प्रहरीले चाडपर्वलाई लक्षित गरी विशेष सुरक्षा योजना लागू गर्दै नियमित जाँच, अनुगमन र संयुक्त प्रहरी परिचालनलाई प्रभावकारी बनाएको जनाएको छ। यातायात व्यवसायी, मजदुर र अन्य सरोकारवालाको सहकार्यले पनि सडक सुरक्षामा सुधार आएको प्रहरीको भनाइ छ।
ट्राफिक प्रहरी प्रमुख एवं प्रहरी वरिष्ठ उपरीक्षक सुरेशप्रसाद काफ्लेले दुर्घटनापछि तत्काल उद्धार र प्रभावकारी उपचारको व्यवस्था गर्दा घाइतेको ज्यान बचाउन सहयोग पुगेको बताए।
यस वर्ष दुर्घटना र मृत्यु हुनेको सङ्ख्यामा कमी आउनु सकारात्मक भए पनि तीव्र गति र दुईपाङ्ग्रे सवारीसाधनसँग सम्बन्धित दुर्घटनाले सडक सुरक्षामा थप सतर्कता आवश्यक रहेको देखाएको छ। ट्राफिक प्रहरीले चालकलाई गति नियन्त्रण गर्न र नियम पालना गरी सुरक्षित यात्रा गर्न आग्रह गरेको छ।
Discussion about this post