काठमाण्डौ — नेपाली कांग्रेसको १५औँ महाधिवेशनबाट नयाँ नेतृत्व चयनका लागि आज मतदान हुँदैछ। निर्वाचन समितिका अनुसार बिहान १० बजेदेखि बेलुकी ६ बजेसम्म मतदान हुनेछ।
महाधिवेशनमा सहभागी ७ हजार २५५ प्रतिनिधिले पार्टीको नयाँ नेतृत्व चयनका लागि मतदान गर्नेछन्। प्रतिनिधिको सहजताका लागि राष्ट्रिय सभागृह, खुलामञ्च र प्रज्ञा भवनमा मतदान केन्द्र तोकिएको छ।
राष्ट्रिय सभागृहमा बागमती प्रदेशका प्रतिनिधिले मतदान गर्नेछन् भने प्रज्ञा भवनमा गण्डकी र लुम्बिनी प्रदेशका प्रतिनिधिका लागि व्यवस्था गरिएको छ। कोशी, मधेश, कर्णाली र सुदूरपश्चिम प्रदेशका साथै भ्रातृ तथा शुभेच्छुक संस्था र जनसम्पर्क समितिका प्रतिनिधिले खुलामञ्चबाट मतदान गर्नेछन्।
सभापति पदका लागि गगन थापा र श्यामकृष्ण खड्गीबीच प्रतिस्पर्धा हुँदैछ। वरिष्ठ उपसभापतिमा विश्वप्रकाश शर्मा तथा महिलातर्फको उपसभापतिमा पुष्पा भुसाल निर्विरोध निर्वाचित भइसकेका छन्।
खुला दुई उपसभापति पदका लागि सात जना र समावेशीतर्फको एक उपसभापति पदका लागि पाँच जना उम्मेदवार चुनावी प्रतिस्पर्धामा छन्।
त्यस्तै, खुला दुई महामन्त्री पदका लागि आठ जना उम्मेदवार मैदानमा छन् भने महिला महामन्त्री पदमा डिला संग्रौला, महालक्ष्मी उपाध्याय र रीता खनालबीच प्रतिस्पर्धा हुँदैछ।
मतदान सम्पन्न भएपछि कांग्रेसको नयाँ नेतृत्व चयनको प्रक्रिया अघि बढ्ने निर्वाचन समितिले जनाएको छ।
Discussion about this post