कञ्चनपुर । विद्यार्थीहरूमा संस्कार, नैतिकता र मातृभूमिप्रतिको जिम्मेवारीबोध विकास गराउने उद्देश्यले कञ्चनपुरको जनज्योति माध्यमिक विद्यालयमा ‘जनज्योति जिज्ञासा मञ्च’ सुरु गरिएको छ ।
विद्यार्थीलाई खोज तथा अनुसन्धानतर्फ प्रेरित गर्दै जिज्ञासु बनाउने र उनीहरूमा अन्तर्निहित प्रतिभा प्रस्फुटनमा सहयोग पुर्याउने उद्देश्यले मञ्च सञ्चालनमा ल्याइएको विद्यालयले जनाएको छ ।
मञ्चअन्तर्गत हालसम्म तीनवटा कार्यक्रम सम्पन्न भएका छन् । पहिलो कार्यक्रममा पठन संस्कृतिको विकास, समस्या र चुनौती, दोस्रोमा लोक संस्कृति र गौरा पर्व तथा तेस्रो कार्यक्रममा दशैं–तिहारको संस्कृति, परम्परा र पुस्तान्तरण विषयमा छलफल तथा प्रस्तुति गरिएको थियो ।
विद्यालयका शिक्षक रमेश पन्त (मीतबन्धु) का अनुसार विद्यार्थीलाई पाठ्यपुस्तकको ज्ञानमा मात्र सीमित नराखी समाज, संस्कृति, परम्परा र समसामयिक विषयबारे खोज तथा अध्ययन गर्न प्रेरित गर्ने उद्देश्यले कार्यक्रम सञ्चालन गरिएको हो ।
साउन महिनादेखि सुरु गरिएको ‘जिज्ञासा मञ्च’ महिनाको कम्तीमा एक दिन अनिवार्य रूपमा सञ्चालन गर्ने उद्देश्य रहेको पन्तले बताउनुभयो । उहाँका अनुसार विद्यार्थीका जिज्ञासा, रुचि र प्रतिभालाई पहिचान गर्दै उनीहरूलाई आफ्नै विषयमा खोज गर्न र आफ्ना विचार प्रस्तुत गर्न मञ्चले अवसर प्रदान गर्नेछ ।
विद्यालयले मञ्चमार्फत विद्यार्थीमा अध्ययन गर्ने बानीको विकाससँगै आफ्नो संस्कृति र परम्पराबारे जानकारी, सामाजिक उत्तरदायित्व तथा नैतिक मूल्य–मान्यताप्रतिको बुझाइ विकास गराउने लक्ष्य राखेको छ ।
Discussion about this post