काठमाडौँ — भोटेकोशी नदीमा आएको बाढीका कारण विभिन्न जलविद्युत आयोजनामा क्षति पुग्दा करिब ४३० मेगावाट विद्युत राष्ट्रिय प्रसारण प्रणालीबाट बाहिरिएको छ। विद्युत आपूर्तिमा परेको असरलाई ध्यानमा राख्दै सरकारले हिउँदे माग व्यवस्थापनका लागि वैकल्पिक व्यवस्था अघि बढाएको छ।
बाढीका कारण त्रिशूली करिडोरबाट काठमाडौँको बालाजु र चपली क्षेत्रमा आउने विद्युत अवरुद्ध भएपछि ती क्षेत्रमा प्रसारण प्रणालीमा चाप परेको ऊर्जा, जलस्रोत तथा सिँचाइ मन्त्रालयले जनाएको छ। समस्या समाधानका लागि नेपाल विद्युत प्राधिकरणले टास्क फोर्स बनाएर काम गरिरहेको छ।
मन्त्रालयले थप भूमिगत विद्युत ग्रिड निर्माण तथा वैकल्पिक आपूर्ति प्रणाली विकासका लागि सडक विभाग र काठमाडौँ महानगरपालिकासँग छलफल गरेको छ। हिउँदमा बढ्ने विद्युत मागलाई ध्यानमा राख्दै भूमिगत ग्रिडलाई थप व्यवस्थित बनाउने तयारी गरिएको हो।
सडक विभागले आवश्यक सहयोग र सहकार्य गर्ने जनाएको छ भने काठमाडौँ महानगरपालिकाले फुटपाथभित्र भूमिगत तार व्यवस्थापनमा सहकार्य गर्ने प्रतिबद्धता जनाएको छ।
विद्युत प्राधिकरणले पनि उपत्यकाभित्र भइरहेको भूमिगत तार व्यवस्थापनलाई थप व्यवस्थित गर्दै हिउँदे विद्युत माग व्यवस्थापनमा आवश्यक सहकार्य गर्ने जनाएको छ। सम्बन्धित निकायबीच निरन्तर समन्वय गरी विद्युत आपूर्तिलाई सहज बनाउने तयारी भइरहेको मन्त्रालयले जनाएको छ।
Discussion about this post