काठमाण्डौ — जापानमा जारी २०औँ एशियाली खेलकुदअन्तर्गत पुरुष क्रिकेटमा अफगानिस्तानले नेपालसामु १०३ रनको लक्ष्य प्रस्तुत गरेको छ।
आइचीस्थित कोरोगी स्पोर्ट्स पार्कमा टस जितेर पहिले ब्याटिङ गरेको अफगानिस्तानले निर्धारित २० ओभरमा ७ विकेट गुमाउँदै १०२ रन बनायो।
अफगानिस्तानका फैसल खान अहमदजई र नजिबुल्लाह जाद्रानले समान ३० रन बनाए। नेपालका लागि कुशल भुर्तेलले ४ तथा ललित राजवंशीले ३ विकेट लिए।
प्रतियोगितामा नेपालले आज पहिलो खेल खेलिरहेको हो। अफगानिस्तानले भने यसअघि जापानलाई पराजित गरिसकेको छ। समूह ‘ए’ मा नेपालसँगै अफगानिस्तान र जापान रहेका छन्।
समूहका शीर्ष दुई टोली क्वाटरफाइनलमा प्रवेश गर्नेछन्। क्वाटरफाइनलमा समूह ‘ए’ बाट छनोट हुने टोलीले भारत वा श्रीलङ्कामध्ये एक टोलीसँग प्रतिस्पर्धा गर्नेछ।
एशियाली खेलकुदको पुरुष क्रिकेटमा नेपाल र अफगानिस्तानबीच १२ वर्षपछि पुनः प्रतिस्पर्धा भएको हो। सन् २०१४ मा दक्षिण कोरियाको इन्चोनमा भएको खेलमा नेपाल अफगानिस्तानसँग ८ रनले पराजित भएको थियो।
एशियाली खेलकुदको पुरुष क्रिकेटमा नेपालको यो चौथो सहभागिता हो। नेपालले यसअघि प्रतियोगितामा क्वाटरफाइनलभन्दा माथिको यात्रा तय गर्न सकेको छैन।
Discussion about this post