काठमाडौं । नेपालमा सूचना प्रविधि क्षेत्र विदेशी लगानीकर्ताको प्रमुख रोजाइमा पर्न थालेको छ। उद्योग विभागका अनुसार पछिल्लो समय अन्य क्षेत्रको तुलनामा सूचना प्रविधिमा विदेशी लगानीको प्रतिबद्धता उल्लेख्य रूपमा बढेको हो।
आर्थिक वर्ष २०८२/८३ मा नेपालका विभिन्न क्षेत्रमा सञ्चालन हुने १ हजार ११६ परियोजनाका लागि ५८ अर्ब रुपैयाँ बराबरको विदेशी लगानी प्रतिबद्धता प्राप्त भएको उद्योग विभागले जनाएको छ।
त्यसमध्ये सूचना प्रविधि क्षेत्रका मात्रै ७२७ परियोजना रहेका छन्। परियोजनाको सङ्ख्याका आधारमा सूचना प्रविधि क्षेत्र अन्य सबै क्षेत्रभन्दा अगाडि देखिएको छ।
उक्त अवधिमा उत्पादनमूलक क्षेत्रमा ६३, ऊर्जामूलक क्षेत्रमा चार, कृषिमूलक क्षेत्रमा १८, पर्यटन क्षेत्रमा २२७, खनिज क्षेत्रमा चार, सेवामूलक क्षेत्रमा ७१ र पूर्वाधारमूलक क्षेत्रमा दुई परियोजनाका लागि विदेशी लगानी प्रतिबद्धता आएको विभागले जनाएको छ।
नेपालमा दक्ष जनशक्तिको उपलब्धता, सूचना प्रविधिमा आधारित सेवा तथा व्यवसायको विस्तार र तुलनात्मक रूपमा कम पूर्वाधारमै व्यवसाय सञ्चालन गर्न सकिने भएकाले यस क्षेत्रमा विदेशी लगानीकर्ताको आकर्षण बढेको बताइएको छ।
यसअघि आर्थिक वर्ष २०८१/८२ मा ८४२ परियोजनाका लागि ६४ अर्ब रुपैयाँ बराबरको विदेशी लगानी प्रतिबद्धता आएको थियो। अघिल्लो वर्षको तुलनामा कुल लगानी प्रतिबद्धताको रकम केही घटे पनि परियोजनाको सङ्ख्या भने उल्लेख्य रूपमा बढेको देखिन्छ।
उद्योग विभागका अनुसार नेपालमा राजनीतिक स्थायित्व, लगानी सुरक्षाको वातावरण र सरल नीतिगत व्यवस्थाप्रति विदेशी लगानीकर्ताको विश्वास बढ्दै गएको छ। यसले आगामी दिनमा सूचना प्रविधिसहित विभिन्न क्षेत्रमा विदेशी लगानी विस्तार हुने सम्भावना देखाएको छ।
Discussion about this post