काठमाडौं। बाबुको सम्मान, पितृको सम्झना र सनातन संस्कृतिको संरक्षणसँग जोडिएको कुशेऔँशी पर्व आज देशभर श्रद्धापूर्वक मनाइँदैछ।
भाद्रकृष्ण औँसीका दिन मनाइने यस पर्वमा वैदिक सनातन धर्मावलम्बीहरूले वर्षभर देवकार्य तथा पितृकार्यमा प्रयोग गरिने पवित्र कुश घरघरमा भित्र्याउने परम्परा छ।
धार्मिक मान्यताअनुसार शास्त्रोक्त विधिबाट पूजा गरी उखेलिएको कुश घरमा राख्दा परिवारमा सुख, शान्ति र कल्याण हुने विश्वास गरिन्छ। आजकै दिन उखेलिएको कुश भने वर्षभरि प्रयोग गर्न सकिने मान्यता छ।
कुशेऔँशीलाई *‘बाबुको मुख हेर्ने दिन’*का रूपमा पनि विशेष महत्वका साथ लिइन्छ। जीवित बाबुलाई छोराछोरीले आफूलाई सक्नेअनुसार मिठो भोजन तथा मिठाइ खुवाएर सम्मान गर्ने र आशीर्वाद लिने गर्छन्।
बाबु गुमाइसकेकाहरू भने आफ्ना दिवंगत पितृको सम्झनामा तीर्थस्थल पुगेर तर्पण, पिण्डदान, श्राद्ध तथा सिदादान गर्ने गर्छन्।
यसै अवसरमा काठमाडौंको गोकर्णेश्वर महादेव मन्दिर परिसरमा विशेष धार्मिक मेला लाग्दैछ। दिवंगत बाबुको नाममा तर्पण तथा पिण्डदान गर्न गोकर्णमा श्रद्धालुको उल्लेख्य उपस्थिति रहने गर्दछ।
यस्तै, रसुवा र नुवाकोटको सङ्गमस्थल वेत्रावतीमा पनि कुशेऔँशीको अवसरमा मेला लाग्ने परम्परा छ। तर यस वर्ष भोटेकोशी बाढीका कारण त्यहाँ मेला सञ्चालन हुने वा नहुने विषयमा अन्योल रहेको छ।
‘पितृदेवो भव’ अर्थात् बाबुआमालाई देवतासरह सम्मान गर्नुपर्छ भन्ने सनातन मान्यतालाई आत्मसात् गर्दै मनाइने कुशेऔँशीले परिवारमा प्रेम, सम्मान र पुस्तौँदेखि चलिआएको संस्कारलाई जोड्ने काम गर्छ।
पवित्र कुश घरमा भित्र्याउँदै, जीवित बाबुको सम्मान गर्दै र दिवंगत पितृलाई श्रद्धापूर्वक सम्झिँदै आज देशभर कुशेऔँशी पर्व मनाइँदैछ।
Discussion about this post