काठमाडौं । प्रतिनिधिसभाका विपक्षी दलहरूले रसुवाको भोटेकोशीमा आएको बाढीपछि सरकारले सञ्चालन गरिरहेको खोज, उद्धार तथा राहत कार्यको समीक्षा गरेका छन्।
नेपाली कांग्रेसको आह्वानमा बिहीबार सिंहदरबारमा बसेको विपक्षी दलहरूको बैठकमा बाढी प्रभावित क्षेत्रमा सरकारको विपद् प्रतिकार्य, राहत तथा उद्धारको अवस्थाबारे छलफल भएको कांग्रेसकी प्रमुख सचेतक बासना थापाले जानकारी दिइन्।
बैठकमा यसअघि बसेको सर्वदलीय बैठकले गरेका निर्णयको कार्यान्वयनको अवस्थासमेत समीक्षा गरिएको उनले बताइन्। बाढी प्रभावित क्षेत्रमा गर्नुपर्ने कामका सम्बन्धमा सर्वदलीय बैठकले प्रतिबद्धता जनाएका नौबुँदे निर्णयको कार्यान्वयन, बाँकी काम तथा आगामी योजनाबारे छलफल भएको थियो।
त्यस्तै, विपद्को प्रभावकारी व्यवस्थापनका लागि विशेष संसदीय समिति गठन गर्ने विषयमा पनि बैठकमा छलफल भएको थापाले जानकारी दिइन्।
थापाका अनुसार सरकारले खोज, उद्धार तथा राहतको काम गरिरहेको भए पनि सम्बन्धित सबै पक्षसँग थप समन्वय र सहकार्य गर्दै कार्यलाई अझ प्रभावकारी बनाउनुपर्ने आवश्यकता बैठकले औंल्याएको छ।
राहत वितरणको सुरुवाती चरणमा केही कमजोरी भएको र वास्तविक पीडितले समयमै राहत पाउन नसकेको गुनासो आएको पनि उनले बताइन्।
विपक्षी दलहरूले सरकारका सकारात्मक काममा सहयोग गर्ने जनाउँदै अब राहत वितरणलाई थप प्रभावकारी बनाउँदै बाढी प्रभावित क्षेत्रको पुनःस्थापना र पुनर्निर्माणमा ध्यान दिनुपर्नेमा जोड दिएका छन्
Discussion about this post