काठमाडौं । एसीसी प्रिमियर कपको सेमिफाइनलमा ओमानलाई ८७ रनले पराजित गर्दै नेपाल फाइनलमा प्रवेश गरेको छ।
मलेसियाको क्वालालम्पुरस्थित वायुमास क्रिकेट ओभलमा टस हारेर पहिले ब्याटिङ गरेको नेपालले ४५.४ ओभरमा १४७ रन बनाएको थियो। १४८ रनको लक्ष्य पछ्याएको ओमान भने २८.१ ओभरमा ६० रनमै अलआउट भयो।
ओमानलाई सस्तैमा समेट्न नेपालका कप्तान सन्दीप लामिछाने र दीपेन्द्रसिंह ऐरीले उत्कृष्ट बलिङ गरे। दुवैले समान ३ विकेट लिए। ललितनारायण राजवंशी र रोहितकुमार पौडेलले समान २ विकेट लिए।
ओमानका लागि जतिन्द्र सिंहले सर्वाधिक २५ रन बनाए। उनले ४१ बलमा २ चौका प्रहार गरे। जितेन रमनान्डीले १३ रन बनाउँदा अन्य कुनै पनि ब्याटरले दोहोरो अंकमा रन बनाउन सकेनन्।
त्यसअघि ब्याटिङ गरेको नेपालका लागि दीपेन्द्रसिंह ऐरीले सर्वाधिक ५१ रनको अर्धशतकीय पारी खेले। उनले ७६ बलमा ४ चौका प्रहार गरे। बसिर अहमदले ४७ रन बनाए। ओपनर देव खनालले १३ तथा आसिफ शेखले १५ रन बनाए।
नेपालको इनिङ्स सम्हाल्ने क्रममा दीपेन्द्रसिंह ऐरी र बसिर अहमदले पाँचौँ विकेटका लागि ९३ रनको महत्वपूर्ण साझेदारी गरेका थिए। त्यसपछि भने नेपालले लगातार विकेट गुमाउँदा १४७ रनमै सीमित भएको थियो।
ओमानका लागि जय विक्रम ओडेडारा र हसनैन शाहले समान ३ विकेट लिए। मोहम्मद इमरानले २ तथा सकिल अहमद र मुजिबुर अलीले समान १ विकेट लिए।
अब नेपालले उपाधिका लागि यूएईसँग प्रतिस्पर्धा गर्नेछ। दोस्रो सेमिफाइनलमा यूएईले हङकङलाई ७ विकेटले पराजित गर्दै फाइनलमा स्थान बनाएको हो।
Discussion about this post