काठमाडौँ । एसीसी पुरुष प्रिमियर कप क्रिकेटको सेमिफाइनलमा नेपाल र ओमानबीच प्रतिस्पर्धा हुँदैछ। मलेसियाको क्वालालम्पुरस्थित बायुमास ओभलमा हुने खेलमा ओमानले टस जितेर नेपाललाई पहिले ब्याटिङको निम्तो दिएको छ।
नेपाल पहिले ब्याटिङ गर्दै ओमानसामु बलियो योगफल प्रस्तुत गर्ने लक्ष्यमा हुनेछ।
नेपाल समूह ‘ए’ को विजेताका रूपमा सेमिफाइनलमा पुगेको हो। समूह चरणका पहिलो तीन खेलमा लगातार जित निकालेको नेपाल अन्तिम खेलमा हङकङसँग १५ रनले पराजित भएको थियो। समान ६ अंक भए पनि राम्रो रनरेटका आधारमा नेपाल समूह विजेता बनेको हो।
ओमान भने समूह ‘बी’ को उपविजेता हुँदै अन्तिम चारमा पुगेको हो। आजको सेमिफाइनल जित्ने टोली प्रतियोगिताको फाइनलमा प्रवेश गर्नेछ।
नेपाल र ओमानबीच पछिल्ला खेलमा मिश्रित नतिजा रहेको छ। अप्रिलमा भएको विश्वकप लिग–२ को खेलमा ओमानले नेपाललाई १०२ रनले हराएको थियो भने मेमा भएको अर्को खेलमा नेपालले ओमानलाई ८१ रनले पराजित गरेको थियो।
यसैगरी, आजै हुने अर्को सेमिफाइनलमा यूएई र हङकङ भिड्दैछन्। दुवै सेमिफाइनलका विजेताबीच प्रतियोगिताको फाइनल शनिबार मलेसियामै हुनेछ।
Discussion about this post