काठमाडौं । पूर्वप्रधानमन्त्री सुशीला कार्कीले नागरिकलाई पुनः सडकमा उत्रिनुपर्ने परिस्थिति सिर्जना हुन नदिन सबै पक्ष जिम्मेवार र सचेत बन्नुपर्ने बताउनुभएको छ।
नवयुवा आन्दोलनको एक वर्ष पूरा भएको अवसरमा सामाजिक सञ्जालमार्फत् सन्देश जारी गर्दै उहाँले राजनीतिक स्थायित्व केवल संसदीय गणितबाट नभई शासन सञ्चालन गर्ने नेतृत्वको चरित्र, जिम्मेवारी र कार्यशैलीबाट निर्धारण हुने उल्लेख गर्नुभएको छ।
कार्कीले देशमा सुशासन कायम गर्न, भ्रष्टाचार नियन्त्रण गर्न, विधिको शासन सुनिश्चित गर्न तथा नागरिकको सम्मान र अधिकारको रक्षा गर्न सरकार प्रभावकारी रूपमा अघि बढ्नुपर्नेमा जोड दिनुभएको छ।
नवयुवा आन्दोलनका क्रममा ज्यान गुमाएका युवाप्रति श्रद्धाञ्जली व्यक्त गर्दै उहाँले घाइतेहरूको शीघ्र स्वास्थ्यलाभको कामना गर्नुभएको छ। आन्दोलनका क्रममा निजी तथा सार्वजनिक सम्पत्तिमा ठूलो क्षति पुगेको तथा राष्ट्रिय सम्पदा र धरोहरसमेत गुमेको स्मरण गर्दै उहाँले त्यसबाट लागेको पीडा र घाउ सजिलै नमेटिने बताउनुभएको छ।
उहाँले नवयुवा आन्दोलनबाट भएको जनधनको क्षतिको पीडा अझै ताजै रहेका बेला भोटेकोशी बाढीले अर्को ठूलो संकट थपेको उल्लेख गर्नुभएको छ। यस्तो कठिन परिस्थितिमा सबै नागरिक धैर्य, जिम्मेवारी र एकताका साथ अघि बढ्नुपर्ने उहाँको भनाइ छ।
भदौ २३ र २४ गते भएको नवयुवा आन्दोलनपछि तत्कालीन केपी शर्मा ओली नेतृत्वको सरकार विघटन भएको थियो। त्यसपछि पूर्वप्रधानन्यायाधीश सुशीला कार्कीको नेतृत्वमा चुनावी सरकार गठन गरिएको थियो।
आन्दोलनका क्रममा ज्यान गुमाएका युवाको सम्झना र सम्मानमा सरकारले आज देशभर सार्वजनिक बिदा दिएको छ। भदौ १८ गते बसेको मन्त्रिपरिषद् बैठकले सार्वजनिक बिदा दिने निर्णय गरेको थियो।
Discussion about this post