कञ्चनपुर । कञ्चनपुरकी युवा हेमन्ती महर डेनमार्कको सिल्केबोर्ग फोक हाइ स्कुलमा पाँचमहिने अध्ययन तथा सिकाइ कार्यक्रमका लागि पूर्ण छात्रवृत्तिमा छनोट भएकी छन्। डीसीए नेपालको गो ग्लोबल परियोजनाअन्तर्गत नेपालभरिबाट छनोट हुने एकमात्र स्वयंसेवकका रूपमा महरले यो अवसर प्राप्त गरेकी हुन्।
२०५९ साल असार २७ गते बैतडीमा जन्मिएकी महर हाल महाकाली तटीय क्षेत्र भीमदत्त नगरपालिका–१२ मा बस्दै आएकी छन्। सामान्य घरपरिवारमा हुर्किएकी उनले कञ्चन विद्या मन्दिरबाट स्नातक तहको अध्ययन पूरा गरेकी हुन्।
उत्थानशील युवा सञ्जाल, भीमदत्त नगरपालिकाकी सदस्य महर विभिन्न सामाजिक तथा युवा केन्द्रित गतिविधिमा सक्रिय रहँदै आएकी छन्। उनी उत्थानशील युवा सञ्जालसँग आबद्ध भएर विपद् जोखिम न्यूनीकरण, युवा सहभागिता, वातावरण संरक्षण तथा विभिन्न सामाजिक अभियानमा सक्रिय रहँदै आएकी छन्।
डीसीए इन्टरनेसनल हेडक्वार्टरबाट लिइएको प्रतिस्पर्धात्मक अन्तर्वार्ता पार गर्दै महरले पूर्ण छात्रवृत्ति प्राप्त गरेकी हुन्। सुदूरपश्चिमबाट पहिलोपटक यस कार्यक्रमका लागि छनोट हुने उम्मेदवारका रूपमा समेत उनको सफलता महत्वपूर्ण रहेको जनाइएको छ।
नेपाल राष्ट्रिय समाज कल्याण संघ एनएनएसडब्ल्यूएका कार्यकारी निर्देशक अशोक विक्रम जैरूले हेमन्तीको सफलता युवा क्षमता र नेतृत्व विकासका लागि महत्वपूर्ण अवसर भएको बताए। उनले डेनमार्कमा हासिल हुने ज्ञान, सीप र अनुभवलाई नेपालमा युवा सशक्तीकरणका क्षेत्रमा उपयोग गर्न सकिने विश्वास व्यक्त गरे।
सुदृढ परियोजनाका संयोजक राजकुमार सुनारले हेमन्तीको छनोटले कञ्चनपुरसहित सुदूरपश्चिमका युवालाई अन्तर्राष्ट्रिय अवसरका लागि प्रेरित गर्ने बताए। उनले डेनमार्कमा प्राप्त सिकाइ र अनुभवलाई समुदाय तथा युवा पुस्तासँग जोड्न सकिने बताए।
डेनमार्कमा पाँच महिना रहँदा महरले नेतृत्व विकास, एक्स्ट्रा करिकुलर एक्टिभिटिज, अन्तर्राष्ट्रिय स्वयंसेवा तथा सामाजिक र सांस्कृतिक गतिविधिमा सहभागी हुने अवसर पाउनेछिन्। त्यहाँबाट प्राप्त ज्ञान, सीप र अनुभवलाई नेपाल फर्किएपछि युवा सशक्तीकरण तथा सामाजिक रूपान्तरणका क्षेत्रमा उपयोग गर्ने अपेक्षा गरिएको छ।
Discussion about this post