उच्च आर्थिक वृद्धि हासिल गर्न निजी क्षेत्रको भूमिका महत्वपूर्ण : उपाध्यक्ष भट्ट

काठमाडौं, राष्ट्रिय योजना आयोगका उपाध्यक्ष डा. गुणाकर भट्टले उच्च आर्थिक वृद्धि हासिल गर्न निजी क्षेत्रको भूमिका निर्णायक रहेको बताएका छन्।

राष्ट्रिय विकास समस्या समाधान समिति बैठकको पूर्वतयारीका क्रममा शुक्रबार आयोजित कार्यक्रममा बोल्दै उपाध्यक्ष भट्टले सात प्रतिशत आर्थिक वृद्धिको लक्ष्य हासिल गर्न बाह्य क्षेत्र र वित्तीय क्षेत्रको अवस्था सन्तोषजनक रहेकाले अब वास्तविक क्षेत्रका गतिविधि विस्तारमा निजी क्षेत्रको सक्रिय सहभागिता आवश्यक रहेको बताए।

उनले राष्ट्रिय योजना आयोगले अन्तर–मन्त्रालय तथा क्षेत्रगत समन्वय गर्दै सरकार र निजी क्षेत्रबीच समस्या समाधानको सेतुका रूपमा काम गर्ने प्रतिबद्धता व्यक्त गरे। साथै, निजी क्षेत्रबाट उठाइएका सुझाव तथा समस्यालाई आगामी राष्ट्रिय विकास समस्या समाधान समितिको बैठकमा प्रस्तुत गरिने जानकारी दिए।

कार्यक्रममा आयोगका सहसचिव खोमराज कोइरालाले सोह्रौँ योजनाको कार्यान्वयन, समष्टिगत आर्थिक अवस्था तथा निजी क्षेत्रको भूमिकाबारे प्रस्तुति दिएका थिए। छलफलका क्रममा सोह्रौँ योजनाका लक्ष्य, सात प्रतिशत आर्थिक वृद्धि र १०० अर्ब अमेरिकी डलर बराबरको अर्थतन्त्र निर्माणका लागि आवश्यक नीतिगत तथा कानुनी सुधारका विषयमा विचार विमर्श गरिएको थियो।

निजी क्षेत्रका छाता संस्थाका प्रतिनिधिहरूले लगानीमैत्री वातावरण, व्यवसायिक सुरक्षा, सार्वजनिक–निजी साझेदारी, लगानी परिचालन, वित्तीय स्रोतको प्रभावकारी उपयोग तथा तरलता व्यवस्थापनमा सुधार आवश्यक रहेको धारणा राखेका थिए।

त्यसैगरी, बैंक तथा वित्तीय क्षेत्रका प्रतिनिधिहरूले आर्थिक गतिविधिमा आएको सुस्तता, कमजोर बजार माग, कर्जा प्रवाहमा कमी तथा खराब कर्जाको बढ्दो समस्याप्रति चिन्ता व्यक्त गर्दै व्यवसायीहरूको मनोबल बढाउने नीति आवश्यक रहेको बताएका थिए।

कार्यक्रममा नेपाल उद्योग वाणिज्य महासङ्घ, नेपाल उद्योग परिसङ्घ, नेपाल चेम्बर अफ कमर्स, नेपाल घरेलु तथा साना उद्योग महासङ्घ, महिला उद्यमी महासङ्घलगायत निजी क्षेत्रका छाता संस्थाका प्रतिनिधिहरूको सहभागिता रहेको थियो। साथै नेपाल बैंकर्स सङ्घ, विकास बैंकर्स सङ्घ, नेपाल वित्तीय संस्था सङ्घ, लघुवित्त बैंकर्स सङ्घ, बैंक तथा वित्तीय संस्था परिसङ्घका प्रतिनिधिहरू, राष्ट्रिय योजना आयोगका सदस्यहरू, प्रधानमन्त्री तथा मन्त्रिपरिषद्को कार्यालय तथा सम्बन्धित मन्त्रालयका सचिव र अन्य पदाधिकारीहरूको पनि उपस्थिति रहेको थियो। मकालु खबर