दार्चुला । सुदूरपश्चिमको दार्चुलास्थित अपिहिमाल गाउँपालिका प्राकृतिक सौन्दर्य र धार्मिक सम्पदाले भरिपूर्ण पर्यटकीय गन्तव्यका रूपमा परिचित छ। हिमाल, ताल, गुफा, पाटन तथा मन्दिर यहाँका प्रमुख आकर्षण हुन्।
अपिहिमालको हिमाली भूगोल, हिउँले ढाकिएका शिखर र सुन्दर पाटनले साहसिक तथा प्रकृतिमा आधारित पर्यटनको सम्भावना बोकेका छन्। हिमालको दृश्यावलोकन, पदयात्रा र आधार शिविरसम्मको यात्रा पर्यटकका लागि विशेष आकर्षण बन्न सक्छ।
यस क्षेत्रका प्रमुख प्राकृतिक गन्तव्यमा कालीढुंगा ताल, रिङने पानी ताल र बयेली ताल रहेका छन्। हिमाली वातावरण, स्वच्छ प्राकृतिक परिवेश र सुन्दर दृश्यले यी तालको पर्यटकीय महत्त्व बढाएका छन्।
त्यस्तै, धर्मी गुफा र मार्कण्डेय गुफा प्राकृतिक बनावट तथा स्थानीय धार्मिक आस्था र जनविश्वाससँग जोडिएका स्थल हुन्।
धार्मिक तथा सांस्कृतिक पर्यटनका दृष्टिले सुरमा भवानी मन्दिर, स्याउडे मन्दिर र महादेव मन्दिर (सिती) महत्त्वपूर्ण गन्तव्यका रूपमा रहेका छन्। विशेषगरी सुरमा भवानी मन्दिर अपिहिमाल गाउँपालिका–३, घाजीरमा अवस्थित छ।
प्राकृतिक र धार्मिक सम्पदाले सम्पन्न अपिहिमालमा आवश्यक पदमार्ग, सुरक्षित आवास, दक्ष पर्यटक गाइड तथा उद्धार व्यवस्थापन गर्न सके राष्ट्रिय तथा अन्तर्राष्ट्रिय पर्यटक आकर्षित गर्न सकिने सम्भावना छ। यस क्षेत्रको पर्यटन प्रवर्द्धनले स्थानीय रोजगारी, आयआर्जन र आर्थिक विकासमा समेत योगदान पुर्याउन सक्छ।
Discussion about this post