कञ्चनपुर । कञ्चनपुरमा जिल्ला, प्रदेश र स्थानीय तहका आपत्कालीन कार्य सञ्चालन केन्द्रहरूबीचको समन्वयात्मक बैठक सम्पन्न गरिएको छ। जिल्ला प्रशासन कार्यालय कञ्चनपुरको समन्वय र नेपाल राष्ट्रिय समाज कल्याण संघ (एनएनएसडब्लुए) र डिसिए नेपालद्वारा सञ्चालित ‘सुदृढ’ परियोजनाको आयोजनामा आयोजित उक्त बैठकमा आपत्कालीन कार्य सञ्चालन केन्द्रहरूको क्षमता विकास, मनसुनजन्य जोखिम न्यूनीकरणमा मौसम पूर्वानुमानको उपयोग र पूर्वकार्यका अनुभव आदानप्रदान लगायतका विविध विषयमा छलफल गरिएको हो।
विपद् व्यवस्थापन र पूर्वतयारीलाई प्रभावकारी बनाउने उद्देश्यले आयोजित उक्त बैठकमा जिल्लाका कञ्चनपुरका विभिन्न गाउँपालिका तथा नगरपालिकाका प्रमुख एवम् उपप्रमुखहरू, सुरक्षा निकायका प्रमुखहरू, स्थानीय तहका विपद् सम्पर्क व्यक्तिहरू र आपत्कालीन कार्य सञ्चालन केन्द्रका प्रतिनिधिहरूको उपस्थिति रहेको थियो।
बैठकमा सहभागीहरूले मनसुनको समयमा आउन सक्ने सम्भावित जोखिमहरू र त्यसलाई कम गर्न स्थानीय तहले चाल्नुपर्ने कदमहरूका बारेमा आ-आफ्नो अनुभव र धारणा राखेको सुदृढ परियोजनाका वातावरणविद् भोजराज भट्टले बताउनुभयो।
कञ्चनपुरका प्रमुख जिल्ला अधिकारी मदन कोइरालाले मनसुनजन्य विपद्को पूर्वतयारीमा विशेष जोड दिनुपर्ने बताए। विपद् आएपछि उद्धार र राहतमा लाग्नुभन्दा विपद् आउनुपूर्व नै गरिने पूर्वकार्यले धनजनको क्षतिलाई धेरै हदसम्म कम गर्न सक्ने उल्लेख गर्दै उनले स्थानीय तहहरूलाई आवश्यक पूर्वतयारी र प्रतिकार्य योजना चुस्त राख्न निर्देशन दिनुभएको छ। उहाँले विपद् व्यवस्थापनमा स्थानीय तह, सुरक्षा निकाय र सरोकारवाला संघसंस्थाहरूबीच निरन्तर समन्वय र सहकार्य आवश्यक रहेको समेत बताउनुभयो।
बैठकमा सुदृढ परियोजनाका संयोजक राजकुमार सुनारले विपद् जोखिम न्यूनीकरणका लागि आधुनिक प्रविधिको प्रयोग र मौसम पूर्वानुमानमा आधारित पूर्वकार्यको महत्त्वमाथि प्रकाश पार्दै वैज्ञानिक मौसम पूर्वानुमानका आधारमा जोखिम आउनु अगावै गरिने पूर्वकार्यले समुदायलाई सुरक्षित राख्न र सम्भावित क्षतिलाई निकै न्यूनीकरण गर्न सकिनेमा जोड दिनुभयो।
Discussion about this post