शेयर बजार ३० अङ्कले घट्यो

नेपाल राष्ट्र बैंकले मौद्रिक नीति सार्वजनिक गरेको भोलिपल्ट नै शेयर बजारमा गिरावट आएको छ। नेपाल स्टक एक्सचेञ्ज (नेप्से) परिसूचक ३० दशमलव ०९ अङ्कले घटेर २ हजार ६२१ दशमलव ५९ विन्दुमा पुगेको हो।

हिजो नेप्से २४ अङ्कले बढेको थियो। मौद्रिक नीतिले बजारमा सकारात्मक प्रभाव पार्ने लगानीकर्ताको अपेक्षा रहे पनि कारोबारको पहिलो दिन बजारमा त्यसको प्रभाव देखिन सकेन।

आज म्युचल फन्डबाहेक सबै समूहका उपसूचक घटेका छन्। सबैभन्दा धेरै जलविद्युत् समूहको उपसूचक १ दशमलव ७० प्रतिशतले ओरालो लागेको छ।

कारोबारमा २४७ वटा कम्पनीको शेयर मूल्य घटेको छ भने २५ वटा कम्पनीको मूल्य बढेको छ। पाँच वटा कम्पनीको शेयर मूल्य भने स्थिर रहेको छ।

आज कर्पोरेट डेभलपमेन्ट बैंकको शेयर मूल्य झन्डै १३ दशमलव ५ प्रतिशतले घटेको छ। बजार समग्रमा ओरालो लागेका दिन सिटिजन्स बैंकको डिबेन्चर भने ८ दशमलव ८७ प्रतिशतले बढेको छ।

नेप्से परिसूचक घटे पनि कारोबार रकम भने बढेको छ। बुधबार ४ अर्ब ४० करोड रुपैयाँको कारोबार भएकोमा आज ३६२ वटा कम्पनीका ८४ लाख ६३ हजार कित्ता शेयर ४ अर्ब ८२ करोड रुपैयाँमा खरिद–बिक्री भएको छ।