नेपाल राष्ट्र बैंकका पूर्वगभर्नर चिरञ्जीवी नेपालले सरकारले सार्वजनिक गरेको आगामी आर्थिक वर्षको मौद्रिक नीतिले सरकारको वित्त नीतिलाई प्रभावकारी रूपमा सघाउने बताएका छन्।
मौद्रिक नीतिमाथि विभिन्न कोणबाट आलोचना भइरहेका बेला पूर्वगभर्नर नेपालले वर्तमान नीति सन्तुलित र आवश्यकताअनुसार आएको धारणा व्यक्त गरेका हुन्।
उनका अनुसार विगतका मौद्रिक नीतिमा सरकारले बजेटमार्फत नदिएका राहतका कार्यक्रमसमेत राष्ट्र बैंकले समेट्ने गरेकाले ती नीति बजेटभन्दा पनि ठूलो देखिने अवस्था थियो। तर यसपटक मौद्रिक नीति आफ्नो मूल भूमिकामा केन्द्रित रहँदै वित्त नीतिलाई सहयोग गर्ने ढंगले आएको उनले बताए।
पूर्वगभर्नर नेपालले मौद्रिक नीतिमा उल्लेख गरिएको ११ प्रतिशत कर्जा विस्तारको लक्ष्यले सरकारले लिएको ७ प्रतिशत आर्थिक वृद्धिको लक्ष्य हासिल गर्न सहयोग पुग्ने विश्वास व्यक्त गरे।
उनले नेपालको अर्थतन्त्रको करिब ४० प्रतिशत हिस्सा अझै अनौपचारिक रहेको उल्लेख गर्दै कर्जा विस्तार नभए पनि ३ देखि ४ प्रतिशतसम्म आर्थिक वृद्धि सम्भव हुने बताए।
यद्यपि, मौद्रिक नीतिले कर्जा कुन–कुन क्षेत्रमा प्रवाह गर्ने भन्ने विषयमा स्पष्ट मार्गनिर्देश नगरेकाले केही अन्योल भने कायम रहेको पूर्वगभर्नर नेपालको भनाइ छ।
Discussion about this post