कञ्चनपुर । सार्क एजुकेसन फाउन्डेसनले कक्षा ११ मा भर्ना भएका नवआगन्तुक विद्यार्थीहरूको भव्य स्वागत गरेको छ। विद्यालयमा भर्ना भएका विद्यार्थीहरूलाई प्रोत्साहन गर्न र उनीहरूको शैक्षिक यात्रा सुखद बनाउनका लागि उक्त कार्यक्रमको आयोजना गरिएको हो।
शैक्षिक क्षेत्रमा छुट्टै पहिचान बनाउन सफल सार्क एजुकेसन फाउन्डेसनले शनिबार रोयल क्राउन पार्टी प्यालेसमा विशेष समारोहका बीच स्वागत कार्यक्रम सम्पन्न गरेको हो। कार्यक्रममा नयाँ शैक्षिक सत्रमा भर्ना भएका विद्यार्थीहरूलाई फाउन्डेसनका तर्फबाट स्वागत तथा सम्मान गरिएको जनाइएको छ।
सार्क एजुकेसन फाउन्डेसनका कार्यकारी निर्देशक डा. लक्ष्मण बस्नेतले विद्यार्थीहरूलाई गुणस्तरीय र प्रविधि सुहाउँदो शिक्षा प्रदान गर्न फाउन्डेसन सदैव प्रतिबद्ध रहेको बताउनुभयो। उहाँले कक्षा ११ र १२ को अध्ययन विद्यार्थीहरूको भविष्य निर्माणको महत्वपूर्ण जग भएकाले समयको सही सदुपयोग गर्दै उत्कृष्ट नतिजा हासिल गर्न विद्यार्थीहरूलाई आग्रह गर्नुभयो।
कार्यक्रममा विद्यालय व्यवस्थापन समितिका पदाधिकारी, प्राध्यापक, शिक्षक तथा विद्यार्थीहरूको उपस्थिति रहेको थियो। स्वागत कार्यक्रममा विद्यार्थीहरूले विभिन्न सांस्कृतिक तथा मनोरञ्जनात्मक प्रस्तुतिहरूसँगै आकर्षक र्याम्प वाकसमेत प्रदर्शन गरेका थिए।
Discussion about this post