कञ्चनपुर । सुदूरपश्चिम विश्वविद्यालयको स्कुल अफ इन्जिनियरिङका विद्यार्थीले राष्ट्रियस्तरको ह्याकाथन आयोजना गर्ने भएका छन्। इन्नोभेटिभ कम्प्युटर इन्जिनियरिङ क्लब (आईसीईसी) को आयोजनामा आगामी मंसिर ५ देखि ७ गतेसम्म ‘इन्नेक्स २०२६’ ह्याकाथन सञ्चालन हुने भएको हो।
क्लबले आइतबार पत्रकार सम्मेलन गरी प्रतियोगिताबारे जानकारी दिएको हो। प्रतियोगिता स्कुल अफ इन्जिनियरिङमा आयोजना हुनेछ।
क्लबकी अध्यक्ष जेलिना भट्टका अनुसार दुई वर्षअघि क्लब स्थापना भएदेखि नै ह्याकाथन आयोजना गर्ने लक्ष्य राखिएको थियो। सूचना प्रविधि, नवप्रवर्तन तथा प्राविधिक विकासलाई प्रोत्साहन गर्ने उद्देश्यले प्रतियोगिता आयोजना गर्न लागिएको उनले बताइन्।
प्रतियोगितामा स्वास्थ्य, शिक्षा, वातावरण, कृषि, साइबर सुरक्षा, फिनटेक, कृत्रिम बुद्धिमत्ता (एआई), मेसिन लर्निङ र ओपन इनोभेसन गरी आठ विधामा प्रतिस्पर्धा हुनेछ। सहभागी टोलीले ४८ घण्टाभित्र विभिन्न समस्याको पहिचान गरी त्यसको प्राविधिक समाधान परियोजनाका रूपमा विकास गरेर प्रस्तुत गर्नुपर्नेछ।
प्रतियोगितामा विभिन्न संकाय तथा विषयमा स्नातक तह अध्ययनरत विद्यार्थी सहभागी हुन पाउनेछन्। नयाँ सोच, सिर्जनशीलता र व्यावहारिक प्राविधिक समाधानलाई प्रोत्साहन गर्ने लक्ष्यसहित आयोजना हुन लागेको ह्याकाथन सफल बनाउन स्कुल अफ इन्जिनियरिङ तथा विभिन्न संघसंस्थासँग सहकार्य भइरहेको आयोजकले जनाएको छ।
Discussion about this post