महेन्द्रनगर भजन साँझ : संस्कृतिको संरक्षणसँगै युवालाई सकारात्मक सोचको सन्देश

महेन्द्रनगर । कञ्चनपुरको महेन्द्रनगरमा प्रत्येक शनिबार आयोजना हुँदै आएको महेन्द्रनगर भजन साँझ धार्मिक आस्था, सकारात्मक सोच र सामाजिक सद्भाव प्रवर्द्धन गर्ने साझा मञ्चका रूपमा विकसित हुँदै गएको छ। भजन तथा कीर्तनमार्फत आध्यात्मिक चेतना अभिवृद्धि गर्नुका साथै मौलिक संस्कृति संरक्षणमा समेत यसले योगदान पुर्‍याउँदै आएको छ।

प्रत्येक शनिबार आयोजना हुने भजन साँझमा विभिन्न उमेर समूहका व्यक्तिहरूको सहभागिता रहने गरेको छ। भजन, कीर्तन र धार्मिक संगीतका माध्यमबाट सहभागीहरूले आध्यात्मिक आनन्द लिनुका साथै आपसी प्रेम, एकता र भाइचाराको सन्देशसमेत ग्रहण गर्ने गरेका छन्।

महेन्द्रनगर भजन साँझकी सञ्चालिका तथा भीमदत्त नगरपालिका–११, भुजेलाकी बिमला जोशीका अनुसार पछिल्लो समय युवा पुस्तालाई धार्मिक गतिविधि र परम्परागत भजन संस्कृतिसँग जोड्ने उद्देश्यले कार्यक्रम सञ्चालन हुँदै आएको छ।

उहाँले नयाँ पुस्तालाई पुराना पुस्ताबाट मौलिक भजन तथा वाद्यकलासम्बन्धी ज्ञान सिकाउँदै नेपाली संस्कृति र परम्परालाई भावी पुस्तासम्म पुर्‍याउने प्रयास भइरहेको बताउनुभयो।

युवा पुस्तालाई कुलतबाट टाढा राख्दै सकारात्मक सोचको विकास गर्नु पनि भजन साँझको अर्को उद्देश्य रहेको जोशीको भनाइ छ। पछिल्लो समय युवा पुस्तामा देखिएको लागूऔषध दुर्व्यसन तथा मोबाइलको अत्यधिक प्रयोगजस्ता समस्याबाट टाढा राखेर उनीहरूलाई भक्तिभाव, सत्कर्म र सकारात्मक गतिविधिमा सहभागी गराउन भजन साँझले प्रेरित गर्ने उहाँले बताउनुभयो।

उहाँका अनुसार भजन साँझ केवल धार्मिक कार्यक्रम मात्र नभई समाजमा आपसी सद्भाव, सहयोग, प्रेम र एकताको भावना विकास गर्ने माध्यमसमेत बनेको छ। यस्ता कार्यक्रमले व्यस्त दैनिकी र मानसिक तनावबीच मानिसलाई केही समय आध्यात्मिक गतिविधिमा सहभागी हुने अवसर प्रदान गर्छन्।

भजन तथा कीर्तनका माध्यमबाट असल कर्म गर्न, ज्येष्ठ नागरिकको सम्मान गर्न र समाजमा शान्ति तथा सद्भाव कायम राख्न प्रेरित गर्ने प्रयास भइरहेको छ। विशेषगरी युवा पुस्तालाई आफ्नो धर्म, संस्कृति, परम्परा र मौलिक पहिचानप्रति सचेत बनाउन यस्ता कार्यक्रम प्रभावकारी हुने विश्वास गरिएको छ।

आधुनिक जीवनशैलीको प्रभावसँगै ओझेलमा पर्दै गएका मौलिक भजन तथा कीर्तन संस्कृतिको संरक्षण र पुस्तान्तरणका लागि पनि महेन्द्रनगर भजन साँझले भूमिका खेल्ने अपेक्षा गरिएको छ।

यसरी प्रत्येक शनिबार सञ्चालन हुँदै आएको महेन्द्रनगर भजन साँझले धार्मिक तथा सांस्कृतिक गतिविधिलाई निरन्तरता दिँदै युवामा सकारात्मक सोच, नैतिक मूल्य र आध्यात्मिक चेतना अभिवृद्धि गर्ने प्रयास गरिरहेको छ।