कञ्चनपुर । नेपाली सेना तथा सशस्त्र प्रहरी बलमा जवान पदका लागि तयारी गरिरहेका परीक्षार्थीलाई लक्षित गर्दै कञ्चनपुरमा पूर्व–ब्यारिङ तथा शारीरिक स्वास्थ्य परीक्षण कार्यक्रम आयोजना गरिएको छ ।
थर्ड आई करियर डेभलपमेन्ट सेन्टरले शनिबार महेन्द्रनगर शाखामा विशेष परीक्षण कार्यक्रम सञ्चालन गरेको हो । सुरक्षा निकायको औपचारिक भर्ना तथा छनोट प्रक्रियामा सहभागी हुनुअघि परीक्षार्थीका शारीरिक अवस्था र ब्यारिङसम्बन्धी सम्भावित समस्या पहिचान गर्ने उद्देश्यले कार्यक्रम आयोजना गरिएको संस्थाले जनाएको छ ।
परीक्षणका क्रममा परीक्षार्थीको उचाइ, छाती र तौल मापन गर्नुका साथै दृष्टि, दाँत तथा हातखुट्टाको बनावटलगायतका आधारभूत मापदण्ड जाँच गरिएको थियो । परीक्षणका क्रममा सामान्य स्वास्थ्य तथा शारीरिक समस्या देखिएका परीक्षार्थीलाई सुधारका उपाय, दैनिक व्यायाम र खानपानसम्बन्धी परामर्शसमेत दिइएको थियो ।
संस्थाका सञ्चालक चेतराज पन्तका अनुसार भर्ना प्रक्रियामा सहभागी हुनुअघि नै आफ्ना शारीरिक कमजोरी पहिचान गरी सुधार गर्न सके छनोट प्रक्रियामा सफल हुने सम्भावना बढ्छ । परीक्षार्थीलाई समयमै आवश्यक जानकारी र मार्गदर्शन उपलब्ध गराउने उद्देश्यले पूर्व–परीक्षण कार्यक्रम सञ्चालन गरिएको उहाँले बताउनुभयो ।
मुख्य कार्यालय धनगढीमा रहेको थर्ड आई करियर डेभलपमेन्ट सेन्टरले महेन्द्रनगर शाखाबाट पनि सुरक्षा निकायमा प्रवेश गर्न चाहने युवाका लागि ब्यारिङ, शारीरिक तथा लिखित परीक्षाको तयारी कक्षा सञ्चालन गर्दै आएको छ । संस्थाले सुदूरपश्चिमका युवालाई सुरक्षा निकायको छनोट प्रक्रियाका लागि आवश्यक प्रशिक्षण र मार्गदर्शन प्रदान गर्दै आएको जनाएको छ ।
Discussion about this post