नेपाल राष्ट्र बैंकले वित्तीय सेवाप्रति ग्राहकको सन्तुष्टिको स्तर मापन गर्न देशव्यापी ग्राहक सन्तुष्टि सर्वेक्षण सञ्चालन गर्ने भएको छ।
राष्ट्र बैंकले सार्वजनिक सूचना जारी गर्दै सबै जिल्लाका सबै प्रकारका पालिका समेटिने गरी ‘र्यान्डम स्याम्पलिङ’ विधिबाट वडा छनोट गरी १० हजार ४०५ नमुना सङ्कलन गरिने जनाएको छ।
सर्वेक्षणमार्फत वित्तीय सेवाको पहुँच, गुणस्तर, पारदर्शिता, गुनासो व्यवस्थापन, वित्तीय ग्राहक संरक्षण तथा समग्र वित्तीय सेवाप्रति ग्राहकको धारणा र अनुभव सङ्कलन गरिनेछ।
राष्ट्र बैंकका अनुसार सर्वेक्षणबाट प्राप्त नतिजाले वित्तीय ग्राहक संरक्षण, सेवा गुणस्तर अभिवृद्धि तथा सम्बन्धित नीति, कार्यक्रम र नियामकीय व्यवस्था सुधार गर्न महत्वपूर्ण आधार प्रदान गर्नेछ।
सर्वेक्षणलाई प्रभावकारी, विश्वसनीय र निष्पक्ष बनाउन तथ्याङ्क सङ्कलनमा आवश्यक सहयोग गर्न राष्ट्र बैंकले सम्बन्धित सबै निकाय तथा सरोकारवालासँग आग्रह गरेको छ।
Discussion about this post