बङ्गलादेशकी अपदस्थ पूर्वप्रधानमन्त्री शेख हसिनाले यसै वर्ष स्वदेश फर्किने घोषणा गर्नुभएको छ। साथै उहाँले आफू अनुपस्थितिमै सुनाइएको मृत्युदण्डको फैसलालाई “गैरकानुनी, असंवैधानिक र राजनीतिक प्रतिशोधबाट प्रेरित” भन्दै अस्वीकार गर्नुभएको छ।
सन् २०२४ को अगस्टमा विद्यार्थी नेतृत्वको आन्दोलनपछि सत्ता गुमाएर भारतमा शरण लिनु भएकी ७८ वर्षीया हसिनाले भारतीय सञ्चारमाध्यम एनडीटीभीसँगको अन्तर्वार्तामा सबै चुनौती र षड्यन्त्र पार गर्दै आफू बङ्गलादेश फर्किने बताउनुभयो।
उहाँले मृत्युदण्डको जोखिमबारे सोधिएको प्रश्नमा आफू मृत्युबाट नडराउने प्रतिक्रिया दिनुभयो।
गएको नोभेम्बरमा ढाकाको एक अदालतले सन् २०२४ को आन्दोलनका क्रममा हत्या गराउन उक्साएको, आदेश दिएको तथा हिंसा रोक्न असफल भएको आरोपमा हसिनालाई अनुपस्थितिमै दोषी ठहर गर्दै मृत्युदण्डको सजाय सुनाएको थियो।
हसिनाले उक्त फैसला अस्वीकार गर्दै न्यायपालिकालाई आफ्नो पार्टी अवामी लिग समाप्त पार्न प्रयोग गरिएको राजनीतिक औजारको रूपमा प्रयोग गरिएको आरोप लगाउनुभएको छ। उहाँका अनुसार आफ्नो स्वदेश फिर्ती व्यक्तिगत महत्वाकाङ्क्षाका लागि नभई लोकतन्त्र, कानुनी शासन र सन् १९७१ को स्वतन्त्रता सङ्ग्रामको भावनालाई पुनःस्थापित गर्नका लागि हो।
उहाँले अवामी लिगमाथिको प्रतिबन्ध हटाउन, पार्टी नेतामाथिका मुद्दा फिर्ता लिन, राजनीतिक बन्दी रिहा गर्न तथा शान्तिपूर्ण राजनीतिक वातावरण सुनिश्चित गर्न वर्तमान सरकारसँग आग्रह गर्नुभएको छ।
यसैबीच प्रधानमन्त्री तारिक रहमान नेतृत्वको सरकारले भने हसिनाको शासनकालका कथित अपराधबारे जवाफदेहिता सुनिश्चित गर्न कानुनी प्रक्रिया अघि बढाइएको जनाएको छ।
Discussion about this post