कञ्चनपुर । कञ्चनपुरको भीमदत्त नगरपालिकामा सामुदायिक विपद् व्यवस्थापन समितिका पदाधिकारीहरूको लागि १ दिने अभिमुखीकरण कार्यक्रम सम्पन्न गरिएको छ। भीमदत्त नगरपालिकाको आयोजना तथा नेपाल राष्ट्रिय समाज कल्याण संघ (एनएनएसडब्लुए) र डिसिए नेपालद्वारा सञ्चालित ‘सुदृढ’ परियोजनाको प्राविधिक सहयोगमा उक्त कार्यक्रम सम्पन्न गरिएको हो।
कार्यक्रममा भीमदत्त नगरपालिकाका उपप्रमुख निलम लेखक जोशीले स्थानीय स्तरमा विपद्को जोखिम न्यूनीकरण र पूर्वतयारीका लागि सामुदायिक विपद् व्यवस्थापन समितिहरूको भूमिका महत्त्वपूर्ण हुने बताउनुभयो। उहाँले विपद्को समयमा समुदाय नै पहिलो उद्धारकर्ता हुने भएकाले यस्ता अभिमुखीकरण कार्यक्रमले पदाधिकारीहरूको क्षमता विकास भई कार्यक्षेत्रमा थप प्रभावकारिता आउने बताउनुभयो।
त्यस्तै भीमदत्त नगरपालिका वन, वातावरण, फोहोरमैला तथा विपद् व्यवस्थापन समितिका संयोजक प्रकाश थापाले पालिकाभित्र वातावरणीय चुनौती र विपद्को जोखिम बढ्दै गएकाले यसप्रति सबै सरोकारवाला सजग हुनुपर्नेमा जोड दिनुभयो। उहाँले स्थानीय तह र समुदायको सहकार्यबाट मात्रै विपद् व्यवस्थापनलाई दिगो र प्रभावकारी बनाउन सकिने बताउनुभयो।
त्यसै गरी सुदृढ परियोजनाका संयोजक राजकुमार सुनारले आगामी दिनमा पनि पालिका र समुदायको साझेदारीमा विपद् पूर्वकार्य र जोखिम न्यूनीकरणका कार्यक्रमहरूलाई निरन्तरता दिइने बताउनुभयो। समुदायको नेतृत्व बलियो भए मात्रै आपत्कालीन अवस्थामा हुने क्षतिलाई न्यूनीकरण गर्न सकिने हुनाले आगामी दिनमा पनि समितिहरूको क्षमता विकासका लागि प्राविधिक सहयोगलाई निरन्तरता दिइने उहाँले बताउनुभयो।
कार्यक्रममा २१ वटा सामुदायिक विपद् व्यवस्थापन समितिहरूलाई आपत्कालीन पूर्वतयारी स्वरूप प्रतिसमिति २ थान टर्च र २ थान त्रिपाल वितरण गरिएको भीमदत्त नगरपालिकाका विपद् सम्पर्क व्यक्ति मनोज प्रसाद भट्टले बताउनुभयो। उहाँका अनुसार नगरपालिकाले वितरण गरेको उक्त सामग्रीहरूले विपद्को समयमा तत्काल उद्धार र राहत कार्यमा प्रारम्भिक सहयोग पुर्याउनेछ।
अभिमुखीकरण कार्यक्रममा सहजकर्ता प्रभु नीति पन्तले विपद् जोखिम न्यूनीकरण, व्यवस्थापन र समितिहरूको काम, कर्तव्य तथा जिम्मेवारीका विषयमा प्रस्तुतीकरण दिनुभएको थियो। कार्यक्रममा विभिन्न वडाका सामुदायिक विपद् व्यवस्थापन समितिका प्रतिनिधिहरूको सहभागिता रहेको थियो।
Discussion about this post