चाँगुनारायणस्थित नेपाल इन्जिनियरिङ कलेज (एनईसी) ले पोखरा विश्वविद्यालयको सेमेस्टर परीक्षामा उत्कृष्ट नतिजा हासिल गर्ने १६० जना विद्यार्थीलाई सम्मान गरेको छ।
आइतबार आयोजित कार्यक्रममा इन्जिनियरिङका विभिन्न विधा तथा आर्किटेक्चर विषयमा उत्कृष्ट प्रदर्शन गर्ने विद्यार्थीलाई प्रमाणपत्र र ट्रफी प्रदान गरी सम्मान गरिएको हो। कार्यक्रममा कलेजका प्राचार्य दुर्गाप्रसाद भण्डारी, सहायक प्राचार्य मोहनध्वज केसी, शिक्षक प्रतिनिधि सदस्य प्रा. डा. सावित्री त्रिपाठीलगायतले सम्मान हस्तान्तरण गर्नुभएको थियो।
कार्यक्रमलाई सम्बोधन गर्दै प्राचार्य भण्डारीले विद्यार्थीहरूको मेहनत र उपलब्धिप्रति कलेज गौरवान्वित भएको बताउँदै गुणस्तरीय, व्यवस्थित र प्रभावकारी शिक्षाका लागि कलेज निरन्तर प्रतिबद्ध रहेको उल्लेख गर्नुभयो।
कलेजका अनुसार आर्किटेक्चरका ६५, सिभिल तथा सिभिल एण्ड रुरल इन्जिनियरिङका ३३, कम्प्युटर इन्जिनियरिङका २२, इलेक्ट्रिकल एण्ड इलेक्ट्रोनिक्स, इलेक्ट्रोनिक्स एण्ड कम्युनिकेशन तथा इन्फर्मेशन एण्ड कम्युनिकेशनका २० तथा बीडीएच कार्यक्रमका २१ जना गरी कुल १६० विद्यार्थीलाई उत्कृष्ट जीपीए हासिल गरेको आधारमा सम्मान गरिएको हो।
मुनाफारहित सामाजिक शैक्षिक संस्थाका रूपमा सञ्चालित नेपाल इन्जिनियरिङ कलेजमा इन्जिनियरिङ विषयमा स्नातक तथा स्नातकोत्तर तहको अध्ययन–अध्यापन हुँदै आएको छ। प्रयोगात्मक शिक्षण प्रणाली, पूर्णकालीन प्राध्यापक, शान्त वातावरण तथा नेपाल इन्जिनियरिङ काउन्सिलको स्थायी मान्यताका कारण कलेज विद्यार्थीको रोजाइमा पर्ने गरेको छ।
कलेजले हरेक वर्ष जेहेन्दार तथा अनुशासित विद्यार्थीलाई १५ करोड रुपैयाँभन्दा बढी बराबरको छात्रवृत्ति उपलब्ध गराउँदै आएको जनाएको छ। साथै, शैक्षिक सत्र २०२६ का लागि प्रवेश परीक्षा यही असार २५ गते सञ्चालन हुने जानकारी पनि कलेजले दिएको छ।
Discussion about this post