कञ्चनपुर । कञ्चनपुरको महेन्द्रनगरस्थित सार्क एजुकेसन फाउन्डेसनले बालबालिकाको सिकाई यात्रा र विद्यालयको अध्यापन पद्धतिबारे अभिभावकहरूसँग अन्तर्क्रिया गर्दै दुई दिने ‘पाठ्यक्रम फ्रेमवर्क तथा अभिभावक साझेदारी दिवस’ सम्पन्न गरेको छ। विद्यालयले आफ्नो पाठ्यक्रम र दृष्टिकोणबारे अभिभावकहरूलाई बुझाउने र उनीहरूसँग बलियो साझेदारी कायम गर्ने उद्देश्यले कार्यक्रमको आयोजना गरेको जनाएको छ।
दुई चरणमा आयोजना गरेको उक्त अन्तर्क्रियात्मक कार्यक्रमको पहिलो दिन असार ६ गते शनिबार कक्षा १, २ र ३ का अभिभावकहरूसँग छलफल गरिएको थियो भने दोस्रो दिन असार ७ गते आइतबार कक्षा ४, ५, ६ र ७ का अभिभावकहरूसँग अन्तर्क्रिया गरिएको छ।
कार्यक्रममा सार्क एजुकेसन फाउन्डेसनका कार्यकारी निर्देशक डा. लक्ष्मण बस्नेतले उपस्थित अभिभावकहरू माझ विद्यालयको पाठ्यक्रमको फ्रेमवर्क प्रस्तुत गर्नुभएको थियो। सो क्रममा उहाँले विद्यालयले अपनाइरहेको आधुनिक शिक्षण विधि र बालबालिकाको बौद्धिक विकासका रणनीतिबारे प्रष्ट पार्नुभएको थियो। डा. बस्नेतले घर र विद्यालय दुवै ठाउँमा बालबालिकाले कस्तो वातावरण पाइरहेका छन् र उनीहरूको सिकाईलाई कसरी अझ प्रभावकारी बनाउन सकिन्छ भन्ने विषयमा अभिभावकहरूसँग प्रत्यक्ष संवाद र छलफल गर्नुभएको थियो।
अन्तर्क्रियाका क्रममा अभिभावकहरूले विद्यालयको पाठ्यक्रम र शैक्षिक वातावरणबारे आफ्ना अनुभव, जिज्ञासा र महत्त्वपूर्ण सुझावहरू राखेका थिए। विद्यालयले अभिभावकहरूबाट प्राप्त भएका ती रचनात्मक सुझावहरूलाई सङ्कलन गरेको र आगामी दिनमा पाठ्यक्रमको व्यवहारिक कार्यान्वयनमा ती सुझावहरूलाई समेटेर लैजाने जानकारी दिएको छ।
सोही अवसरमा विद्यालयले राष्ट्रिय परीक्षा बोर्डद्वारा लिइएको कक्षा १२ को परीक्षामा उत्कृष्ट नतिजा ल्याउन सफल जेहेन्दार विद्यार्थी र उनीहरूका अभिभावकलाई सम्मान पत्र र नगदसहित विशेष सम्मान गरेको थियो। शैक्षिक क्षेत्रमा विद्यार्थीले प्राप्त गरेको सफलतामा अभिभावकको त्याग र मेहनतको उच्च मूल्याङ्कन गर्दै उनीहरूलाई सम्मानित गरिएको फाउन्डेसनले जनाएको छ।
Discussion about this post