कञ्चनपुर । कञ्चनपुरको कृष्णपुर नगरपालिका वडा नम्बर २ खल्लगोठमा जैविक तटबन्ध निर्माणको कार्य सुरु गरिएको छ। नेपाल राष्ट्रिय समाज कल्याण संघ (एनएनएसडब्लुए) र मर्सीकोर नेपालको साझेदारीमा सञ्चालित ‘समुदायका लागि जलवायु उत्थानशील (सिआरसी)’ परियोजना अन्तर्गत कृष्णपुर नगरपालिका तथा वडा कार्यालयको सहकार्यमा उक्त क्षेत्रमा १७० मिटर जैविक तटबन्ध निर्माण गरिन लागिएको हो।
जैविक तटबन्ध निर्माणका साथै उक्त क्षेत्रमा बगर संरक्षण कार्यलाई समेत तीव्रताका साथ अगाडि बढाइएको छ। परियोजनाले बगर संरक्षणका लागि डिभिजन वन कार्यालयसँग सहकार्य गरी प्रक्रिया अगाडि बढाएको हो। बगर संरक्षण कार्यक्रम अन्तर्गत १२५० मिटर तारबार गरिने भएको छ जसमा डिभिजन वन कार्यालयले ९०० मिटर तारबार गर्नेछ भने सिआरसी परियोजनाबाट ३५० मिटर तारबार गरिनेछ।
सिआरसी परियोजनाका संयोजक महेश घिमिरेले मछेली नदीको बाढी र कटानको जोखिममा रहेको खल्लगोठ क्षेत्रलाई सुरक्षित बनाउन र पर्यावरण जोगाउन जैविक तटबन्ध तथा बगर संरक्षणको काम अघि बढाइएको बताउनुभयो। उहाँले तारबार गरिएको बगर क्षेत्रमा नदी नियन्त्रणलाई थप दिगो बनाउन वृक्षारोपणसमेत गरिने जानकारी दिनुभयो। स्थानीय सरकार र डिभिजन वन कार्यालय जस्ता सरोकारवाला निकायको समन्वयमा हुने उक्त वृक्षारोपण र जैविक तटबन्धले दीर्घकालीन रूपमा नदी कटान नियन्त्रण तथा जैविक विविधता संरक्षणमा योगदान पुर्याउने बताउनुभयो।
त्यसै गरी स्थानीय एवम् मछेली सामुदायिक विपद् व्यवस्थापन समितिकी उपाध्यक्ष चन्द्रा देवी देउवाले विगतका दिनहरूमा वर्षायाममा मछेली नदीमा आउने बाढीका कारण यस क्षेत्रमा डुबान र कटानको समस्या भोग्दै आउनुपरेको बताउनुभयो। उहाँले अहिले सुरु भएको जैविक तटबन्ध र तारबारको कामले स्थानीय समुदायमा सुरक्षाको आशा जगाएको बताउनुभयो।
त्यस्तै जनहित महाकाली सामुदायिक वन उपभोक्ता समितिका अध्यक्ष सुनाव बहादुर डङ्गौराले वन र नदी किनारको जमिन संरक्षण गर्न यो संयुक्त प्रयास फलदायी हुने बताउनुभयो। उहाँले जैविक तटबन्धले नदीको बहावलाई रोक्ने र तारबारले बगर क्षेत्रमा हुने क्षति कम गरी वृक्षारोपणलाई समेत प्रवर्धन गर्ने बताउनुभयो।
स्थानीय युवा रोक बहादुर साउदले विपद्को उच्च जोखिममा रहेको आफ्नो गाउँमा समुदायकै सक्रियता र परियोजनाको प्राविधिक सहयोगमा तटबन्ध निर्माण हुनु स्वागतयोग्य रहेको बताउनुभयो। उहाँले यस कार्यलाई प्रभावकारी र दिगो बनाउन स्थानीय बासिन्दा सबैले एकजुट भएर लाग्नुपर्ने बताउनुभयो
Discussion about this post