भारतले नेपाली चिया निर्यातमा अवरोध गरेपछि झापाका चिया उद्योग तथा बगान पनि भोलिदेखि बन्द हुने भएका छन्। समस्या समाधानका लागि सरकार र भारतीय पक्षबाट कुनै ठोस पहल नभएको भन्दै उद्योगीहरूले उद्योग बन्द गर्ने निर्णय गरेका हुन्।
नेपाल चिया उत्पादक सङ्घले आज झापामा पत्रकार सम्मेलन गर्दै निर्यात प्रभावित भएपछि उद्योग सञ्चालन गर्न कठिन भएको जनाएको छ। सङ्घका अनुसार इलामका ५० भन्दा बढी अर्थोडक्स चिया उद्योग असार १ गतेदेखि नै बन्द भइसकेका छन्।
झापामा रहेका साना–ठूला गरी ३० भन्दा बढी चिया उद्योग र करिब दुई दर्जन चिया बगान बन्द हुने तयारीमा छन्। झापामा अर्थोडक्स र सीटीसी गरी वार्षिक १२ देखि १४ अर्ब रुपैयाँ बराबरको चिया उत्पादन हुने गर्दछ।
चिया उद्योगमा प्रत्यक्ष तथा अप्रत्यक्ष रूपमा करिब ६० हजार श्रमिक, कर्मचारी र किसान आश्रित रहेको बताइएको छ। निर्यात हुन नसकेर चिया थन्किँदा श्रमिकको ज्याला तथा किसानलाई हरियो चियापत्तीको भुक्तानी गर्न समेत समस्या भएको व्यवसायीहरूको भनाइ छ।
पत्रकार सम्मेलनमा नेपाल चिया उत्पादक सङ्घका अध्यक्ष आदित्य पराजुलीले विगत ४५ दिनदेखि सरकारको ध्यानाकर्षण गराउँदा पनि कुनै सुनुवाइ नभएको गुनासो गरे। सम्बन्धित निकायसम्म आफ्ना समस्या पुर्याउनसमेत कठिन भएको उल्लेख गर्दै उनले उद्योग र बगान बन्द गर्नुको विकल्प नरहेको बताए।
यसैबीच, नेपाली कांग्रेसका सचेतक निश्कल राईले नेपाली चियाको तेस्रो मुलुकमा निर्यात सुनिश्चित गर्न सरकारसँग माग गरेका छन्। प्रतिनिधिसभाको बैठकमा आकस्मिक समय लिएर बोल्दै उनले गुणस्तर परीक्षणको नाममा भारतले चिया निर्यातमा अवरोध सिर्जना गरेको आरोप लगाए।
राईले चिया उद्योग बन्द हुँदा हजारौं श्रमिक र किसान प्रभावित भएको उल्लेख गर्दै समस्या समाधानका लागि सरकारले तत्काल पहल गर्नुपर्ने आवश्यकता औंल्याए।
Discussion about this post