यस वर्ष नेपालमा मनसुन भित्रिन सामान्य समयभन्दा ढिलाइ भएको छ। जल तथा मौसम पूर्वानुमान महाशाखाका अनुसार मनसुनी वायु नेपालको सीमाक्षेत्र आसपास पुगे पनि अझै देशभित्र प्रवेश गर्न सकेको छैन।
महाशाखाका अनुसार सरदर जुन १३ तारिखमा नेपालमा मनसुन भित्रिने भए पनि यस वर्ष हालसम्म मनसुन सक्रिय रूपमा प्रवेश भएको घोषणा गरिएको छैन। मौसमविद्हरूले मनसुनी प्रणालीको आवश्यक मापदण्ड पूरा भएपछि मात्र औपचारिक रूपमा मनसुन भित्रिएको घोषणा गरिने बताएका छन्।
हालको मौसम अवस्थाअनुसार आज कोशी प्रदेशका केही स्थान तथा हिमाली र पहाडी भेगका केही ठाउँमा मध्यम वर्षा हुन सक्ने सम्भावना रहेको छ। तर सुदूरपश्चिम प्रदेशको तराई क्षेत्रमा भने मौसम सामान्यतया सफा रहने अनुमान गरिएको छ।
मौसमविद्हरूका अनुसार भोलि र पर्सि लुम्बिनी र सुदूरपश्चिम प्रदेशका तराई क्षेत्रमा तातो दिन (हट डे) हुने सम्भावना छ। पछिल्लो केही दिनको वर्षाका कारण केही हदसम्म घटेको गर्मी फेरि बढ्ने देखिएको छ।
गत शुक्रबारसम्म देशका विभिन्न भागमा परेको वर्षाले तापक्रम घटाएको भए पनि वर्षा क्रमशः कम हुँदै गएपछि गर्मी पुनः बढ्न थालेको हो।
गत वर्ष भने मनसुन सामान्य समयभन्दा करिब १५ दिन अगाडि, जेठ १६ गते नै नेपाल प्रवेश गरेको थियो। तर त्यसबेला मनसुन पूर्वी क्षेत्रमा लामो समयसम्म सीमित भएको मौसमविद्हरूले बताएका थिए।
यस वर्ष मनसुन अवधिमा कम वर्षा र बढी गर्मी हुन सक्ने प्रारम्भिक प्रक्षेपण गरिएको छ। नेपालमा मनसुन अवधिमा वार्षिक वर्षाको झण्डै ८० प्रतिशत पानी पर्ने गर्छ।
मनसुन सामान्यतया असोज मध्यसम्म रहने गर्दछ। मौसम पूर्वानुमान महाशाखाले हालको परिस्थितिबारे निरन्तर अध्ययन गरिरहेको जनाएको छ।
Discussion about this post