लोकसेवा आयोगले आफ्नो ७६औं वार्षिकोत्सव तथा हीरक जयन्ती वर्षको अवसरमा आज बिहान प्रभातफेरी कार्यक्रम आयोजना गरेको छ। आयोगको कार्यालय कमलपोखरीबाट सुरु भएको प्रभातफेरी अनामनगर, सिंहदरबार, सर्वोच्च अदालत र पुतलीसडक हुँदै पुनः कमलपोखरीमा पुगेर समापन गरिएको आयोगका प्रवक्ता तथा सहसचिव पुरुषोत्तम शर्माले जानकारी दिए।
प्रभातफेरीमा आयोगका कर्मचारी तथा विभिन्न संघ–संस्थाका प्रतिनिधिहरूको सहभागिता रहेको थियो।
कार्यक्रमपछि बोल्दै आयोगका अध्यक्ष माधवप्रसाद रेग्मीले आयोगले योग्यता र दक्षताका आधारमा कर्मचारी छनोट तथा व्यवस्थापन गर्दै आएको उल्लेख गरे। उनले निष्पक्षता, स्वच्छता र पारदर्शितालाई आयोगको मूलमन्त्रका रूपमा अपनाइएको बताए।
आयोगले यस वर्षको नारा “प्रतिस्पर्धात्मक छनौटको सुनिश्चितता, लोकसेवा आयोगको प्रतिबद्धता” तय गरेको छ।
नेपालको अन्तरिम शासन विधान, २००७ अनुसार विसं २००८ असार १ गते पब्लिक सर्भिस कमिसन स्थापना भएको थियो। आयोगले विसं २०८२ असार १ देखि २०८३ असार १ सम्मको अवधिलाई हीरक जयन्ती वर्षका रूपमा विभिन्न कार्यक्रम गरी मनाइरहेको छ।
Discussion about this post