एजेन्सी – युरोपेली सङ्घ (इयू) ले विद्यालय तहका बालबालिकालाई कृत्रिम बुद्धिमत्ता (एआई) सम्बन्धी ज्ञान र सीप प्रदान गर्न विशेष प्रमाणपत्र कार्यक्रम सञ्चालन गर्ने भएको छ।
एएफपीका अनुसार १५ वर्ष उमेरका विद्यार्थीलाई लक्षित गरी सन् २०२७/२०२८ को शैक्षिक सत्रदेखि कार्यक्रम परीक्षण गर्ने इयूको योजना छ।
एआईको बढ्दो प्रयोगलाई ध्यानमा राख्दै ल्याउन लागिएको कार्यक्रमले विद्यार्थीलाई एआईको कार्यप्रणाली बुझ्न, यसबाट प्राप्त सूचनाको सत्यता जाँच्न, भ्रामक सामग्री पहिचान गर्न र सुरक्षित रूपमा यसको प्रयोग गर्न सक्षम बनाउनेछ।
युरोपेली आयोगकी उपाध्यक्ष रोक्साना मिन्जाटुका अनुसार यस कार्यक्रमले विद्यार्थीमा एआईको जिम्मेवार प्रयोगसम्बन्धी क्षमता विकास गर्न सहयोग पुर्याउनेछ।
विद्यालयमा एआईको प्रयोग बढ्दै गएको र यसले शिक्षा क्षेत्रमा पार्ने प्रभावबारे बहस भइरहेका बेला इयूले यस्तो पहल गर्न लागेको हो।
यसका साथै इयूले किशोरकिशोरीको सामाजिक सञ्जाल प्रयोग सीमित गर्ने कानुनी पहलसमेत अघि बढाइरहेको छ।
Discussion about this post