काठमाण्डौ – सरकारले यस वर्षको शीतलहर र हिमपातबाट हुनसक्ने जनधनको क्षति न्यूनीकरण गर्न पूर्वतयारी थालेको छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले तराई क्षेत्रमा शीतलहर तथा उच्च पहाडी र हिमाली क्षेत्रमा हिमपातको जोखिमलाई मध्यनजर गर्दै आवश्यक तयारी अघि बढाएको हो।
प्राधिकरणका कार्यकारी प्रमुख डा. धर्मराज उप्रेतीले शीतलहर र हिमपातलाई सामान्य मौसमी अवस्थाका रूपमा लिन नहुने बताउनुभएको छ। उहाँले सम्भावित जोखिमबाट जनधनको क्षति रोक्न समयमै पूर्वतयारी र प्रतिकार्य योजना बनाउनुपर्नेमा जोड दिनुभयो।
मध्य मङ्सिरदेखि मध्य फागुनसम्म तराईमा शीतलहर, कुहिरो र हुस्सु तथा उच्च पहाडी र हिमाली क्षेत्रमा हिमपातको जोखिम रहने उहाँले बताउनुभयो। लामो समयसम्म चिसो बढ्ने र बाक्लो हुस्सु लाग्ने अवस्थाले जनजीवन प्रभावित पार्न सक्ने उहाँको भनाइ छ।
शीतलहरसँगै वायु प्रदूषणको जोखिमसमेत बढ्ने भएकाले स्वास्थ्य सुरक्षामा विशेष ध्यान दिनुपर्ने प्राधिकरणले जनाएको छ। प्रदूषणको अवस्था गम्भीर बनेमा विद्यालय बन्द गर्ने, सवारीसाधनमा जोरबिजोर प्रणाली लागू गर्ने तथा निर्माण कार्य रोक्नेसम्मका उपाय अपनाउनुपर्ने कार्यकारी प्रमुख उप्रेतीले बताउनुभयो।
बाक्लो हुस्सु र तुवाँलोका कारण हवाई तथा सडक यातायात प्रभावित हुनुका साथै दुर्घटनाको जोखिमसमेत बढ्ने उहाँले उल्लेख गर्नुभयो। कतिपय अवस्थामा दृश्यता ५० मिटरसम्म सीमित हुन सक्ने भएकाले यातायात सञ्चालनमा विशेष सतर्कता अपनाउनुपर्ने उहाँको भनाइ छ।
त्यस्तै, दुई हजारदेखि दुई हजार पाँच सय मिटरभन्दा माथिका उच्च पहाडी तथा हिमाली क्षेत्रमा हिमपात हुनसक्ने भएकाले स्थानीय बासिन्दा, पर्यटक र यात्रुको सुरक्षाका लागि आवश्यक तयारी गर्नुपर्ने उहाँले बताउनुभयो।
शीतलहरबाट गर्भवती, नवजात शिशु, बालबालिका, ज्येष्ठ नागरिक र दीर्घरोगी बढी प्रभावित हुन सक्ने भएकाले उनीहरूको सुरक्षामा विशेष ध्यान दिनुपर्ने प्राधिकरणले जनाएको छ। जोखिमयुक्त क्षेत्रमा दाउरा वितरण गर्नुका साथै विपन्न परिवारलाई न्यानो कपडा र कम्बल उपलब्ध गराउने तयारी गर्न पनि सम्बन्धित निकायलाई आग्रह गरिएको छ।
Discussion about this post