कञ्चनपुर । कञ्चनपुरको भीमदत्त नगरपालिका वडा नम्बर १३ मा विपद् पुर्वतयारीका लागि बाढीमा आधारित कृत्रिम नमुना अभ्यास गरिएको छ। मनसुन भित्रिनै लाग्दा समुदायलाई सम्भावित जोखिमबाट बचाउन र पूर्वतयारी अवस्थामा राख्न सोनापुर सामुदायिक विपद् व्यवस्थापन समितिको आयोजनामा उक्त अभ्यास गरिएको हो।
निड्स नेपाल र अक्सफामको साझेदारीमा सञ्चालित ‘स्कोप आर थ्री’ परियोजना अन्तर्गत उक्त कृत्रिम नमुना अभ्यास गरिएको गरिएको परियोजनाका सामाजिक परिचालक अमर जाग्रीले बताउनुभयो। वर्षेनी मनसुन सुरु भएसँगै बाढीको त्रासमा रहने यस क्षेत्रमा महाकाली नदीका कारण डुबान र कटानको जोखिम उच्च रहने गर्दछ। बाढी आएको अवस्थामा बाह्य सहयोग पुग्नु अगावै समुदाय स्तरमै तत्काल कसरी खोज तथा उद्धार गर्ने, सूचनाको आदानप्रदान कसरी चुस्त राख्ने र सुरक्षित आश्रयस्थलसम्म कसरी पुग्ने भन्ने विषयलाई व्यावहारिक रूपमा प्रदर्शन गर्न कृत्रिम नमुना अभ्यास गरिएको उहाँले बताउनुभयो।
यस्तै भीमदत्त नगरपालिका वडा नम्बर -१३ का वडा अध्यक्ष राम बहादुर बोहोराले समुदायलाई बाढी जस्तो विपद्को बेला कसरी सुरक्षित राख्ने, पूर्वसूचनाहरू कसरी समयमै सम्बन्धित ठाउँमा पुर्याउने, कोसँग समन्वय गर्ने, कसरी प्रतिकार्य गर्ने तथा सुरक्षित स्थानमा कसरी बस्ने लगायतका बारेमा समुदायलाई सचेत गराउन अभ्यास निकै प्रभावकारी रहेको बताउनुभयो। उहाँले मनसुनको पूर्वसन्ध्यामा गरिएको कृत्रिम अभ्यासले वर्षेनी बाढीको त्रासमा रहने यस क्षेत्रका बासिन्दाको आत्मविश्वास र पूर्वतयारीलाई बलियो बनाएको बताउनुभयो।
सोनापुर सामुदायिक विपद् व्यवस्थापन समितिकी सदस्य लक्ष्मी बोहोराले मनसुनकै पूर्वसन्ध्यामा गरिएको यस अभ्यासले आफू र आफ्नो समुदायको आत्मबल बढेको बताउनुभयो। उहाँले बाढी आएको समयमा कसरी प्रतिकार्य गर्ने, कसरी सुरक्षित रहने र कसरी आफ्नो र आफ्नो समुदायलाई सुरक्षित राख्ने लगायतका विषयमा सक्षम भएको बताउनुभयो।
कृत्रिम नमुना अभ्यास कार्यक्रममा स्थानिय जनप्रतिनिधि, परियोजनाका प्रतिनिधि, स्थानिय बासिन्दा तथा सुरक्षा निकायका प्रतिनिधिहरूको सहभागिता रहेको थियो।
Discussion about this post