काठमाडौं । साहित्यकार तथा अनेसास केन्द्रीय उपाध्यक्ष गणेश खड्का द्वारा लिखित नियात्रा–निबन्धसङ्ग्रह ‘नक्शामा नभएको देश’ पूर्वी अफ्रिकी राष्ट्र सेसेल्स को राजधानी भिक्टोरिया मा लोकार्पण गरिएको छ।
मिलाप पब्लिकेशन प्रा.लि. काठमाडौंद्वारा प्रकाशित तथा साहित्यकार–सम्पादक रमेश दाहाल द्वारा सम्पादित उक्त कृतिको लोकार्पण कार्यक्रम जुन ७ मा माहे आइल्याण्डस्थित भिक्टोरियामा सम्पन्न भएको हो।
एनआरएनए सेसेल्सका उपाध्यक्ष प्रेमबहादुर चन्द को सभापतित्वमा सम्पन्न कार्यक्रममा एनआरएनए अफ्रिका क्षेत्रीय संयोजक मनोज बि.क. प्रमुख अतिथि तथा अफ्रिका क्षेत्रीय महिला संयोजक खेसेना लिङ्देन विशेष अतिथिका रूपमा सहभागी थिए। कार्यक्रमको स्वागत मन्तव्य एनआरएनए सेसेल्सकी महिला उपाध्यक्ष पवित्रा भट्टराई ले राखेकी थिइन्।
कार्यक्रममा बोल्दै प्रमुख अतिथि मनोज बि.क.ले नेपाली समाजमा कम परिचित रहेको सेसेल्सबारे लेखकले आफ्नो अनुभव र अध्ययनलाई कलात्मक ढङ्गले प्रस्तुत गरेर महत्त्वपूर्ण कृति प्रदान गरेको बताए। उनले उक्त पुस्तकलाई केवल साहित्यिक कृति नभई ऐतिहासिक दस्तावेजका रूपमा समेत लिनुपर्ने धारणा व्यक्त गरे।
लेखक गणेश खड्काले सेसेल्समा रोजगारीका लागि पुगेपछि त्यस देशबारे नेपाली समाजमा पर्याप्त जानकारी नभएको अनुभव गरेको स्मरण गर्दै अनुसन्धान र अध्ययनपछि पुस्तक लेख्ने प्रेरणा पाएको बताए। उनले आफ्ना अनुभव, भोगाइ र अवलोकनलाई पुस्तकमार्फत पाठकमाझ ल्याउन सफल भएको उल्लेख गरे।
सम्पादक रमेश दाहालले पुस्तकलाई नेपाली पाठकका लागि केवल अध्ययन सामग्री नभई समाज, सपना र यथार्थलाई नयाँ दृष्टिकोणबाट हेर्न प्रेरित गर्ने कृतिका रूपमा व्याख्या गरेका छन्। उनका अनुसार ‘नक्शामा नभएको देश’ समकालीन नेपाली नियात्रा–निबन्ध साहित्यको महत्त्वपूर्ण र गम्भीर कृतिका रूपमा स्थापित हुने विश्वास व्यक्त गरिएको छ।
प्रकाशक मिलाप पब्लिकेशनका अध्यक्ष कृष्ण भुसाल ले लेखक नेपाल फर्किएपछि पुस्तकमाथि बृहत् अन्तर्क्रिया कार्यक्रम आयोजना गरिने जानकारी दिए।
एनआरएनए सेसेल्स र अनेसास अफ्रिका महादेशीय च्याप्टरको संयुक्त आयोजनामा सम्पन्न कार्यक्रममा कवि महेन्द्र भट्टराई ले पुस्तकमाथि समीक्षात्मक परिचर्चा गरेका थिए। कार्यक्रमको सहजीकरण अनेसास अफ्रिका च्याप्टरका महासचिव कवि आर.सी. राई र सदस्य कवि गायत्री कुलुङ ले गरेका थिए।
Discussion about this post