कञ्चनपुर । राष्ट्रीय स्वतन्त्र पार्टी (रास्वपा) सुदूरपश्चिम प्रदेश कार्यालयले कञ्चनपुरका वरिष्ठ चिकित्सक डा. वीरेन्द्र सिंह बुडाललाई पार्टीको प्रदेश स्वास्थ्य तथा जनसंख्या विभाग प्रमुख पदमा नियुक्त गरेको छ।
कञ्चनपुरको बेलौरी नगरपालिका वडा नम्बर ४ निवासी डा. बुडाललाई रास्वपा सुदूरपश्चिम प्रदेश सभापति ई. प्रकाश विष्टद्वारा हस्तान्तरित पत्रमार्फत सो महत्त्वपूर्ण जिम्मेवारी प्रदान गरिएको हो। गत वैशाख ३० गते जारी गरिएको नियुक्ति पत्र अनुसार डा. बुडाललाई पार्टीको विधान, नीति, सिद्धान्त, विभागको नियमावली तथा कार्यविधि बमोजिम आफ्नो पदीय जिम्मेवारी कुशलतापूर्वक निर्वाह गर्न निर्देशित गरिएको छ।
चिकित्सा क्षेत्रमा लामो र प्रतिष्ठित अनुभव सम्हाल्नुभएका डा. बुडाल ‘एमडी एनेस्थेसिया एन्ड क्रिटिकल केयर स्पेसलिष्ट’ हुन्। विगत २०–२१ वर्षदेखि स्वास्थ्य क्षेत्रमा निरन्तर आबद्ध रहँदै आउनुभएका डा. बुडाल हाल मन्त्र हस्पिटल एण्ड रिसर्च सेन्टरको सञ्चालक समिति सदस्य समेत हुन्।
लामो समयदेखि कञ्चनपुरसहित समग्र सुदूरपश्चिमको स्वास्थ्य अवस्थालाई नजिकबाट नियाल्नुभएका डा. बुडालको यो नियुक्तिले यस क्षेत्रको स्वास्थ्य नीति निर्माण र जनसरोकारका मुद्दाहरूलाई सम्बोधन गर्न थप मद्दत पुग्ने विश्वास रास्वपाले लिएको छ।
नवनियुक्त विभाग प्रमुख डा. बुडालले प्रादेशिक तहमा स्वास्थ्य सेवाको पहुँच विस्तार, महामारी नियन्त्रण, गुणस्तरीय चिकित्सा शिक्षा र सरकारी अस्पतालहरूको स्तरोन्नतिका लागि नीतिगत दबाब सिर्जना गर्न आफूले नेतृत्वदायी भूमिका खेल्ने बताउनुभयो। उहाँले सुदूरपश्चिमका दूरदराजका नागरिकहरूले अझै पनि सामान्य उपचारका लागि भौँतारिनुपर्ने अवस्थाको अन्त्य गर्न राजनीतिक तथा नीतिगत तहमै ठोस कार्ययोजना बनाएर अघि बढ्ने प्रतिबद्धता समेत व्यक्त गर्नुभयो।
Discussion about this post