दार्चुलाकी सपनाको आर्थिक अभावमा उपचारमा समस्या, सहयोग गरिदिन अपिल

कञ्चनपुर । दार्चुलाको मालिकार्जुन गाउँपालिका वडा नम्बर ३, पास्ती (औताले) स्थायी घर भएकी २७ वर्षीया सपना टेर धामी अचानक गम्भीर बिरामी परेर काठमाडौँको ग्रीन सिटी अस्पतालमा जीवन र मरणको दोसाँधमा लडिरहनुभएको छ।

उहाँलाई अचानक मस्तिष्क रक्तस्राव (Brain Hemorrhage) हुनुका साथै निमोनिया (Severe Pneumonia) भएपछि गम्भीर अवस्थामा अस्पताल भर्ना गरिएको हो। हाल उहाँको अस्पतालको सघन उपचार कक्ष (ICU) मा विशेष टोलीद्वारा उपचार भइरहेको छ।

कलिलो उमेरमै अचानक परेको यो ठूलो बज्रपातका कारण सपनाको परिवार यतिखेर गम्भीर मानसिक र आर्थिक सङ्कटमा परेको छ। अस्पतालको औषधी र दैनिक उपचार खर्च निकै महँगो भएकाले कमजोर आर्थिक अवस्था भएको परिवारलाई उपचार खर्च जुटाउन निकै सकस भइरहेको छ।

सपनाका आफन्त राजन टेरले दिएको जानकारी अनुसार डाक्टरहरूले सपनाको स्वास्थ्यमा सुधार आउने र उपचार सम्भव रहेको बताएका छन्। तर, अस्पतालको दैनिक खर्च र औषधी उपचारको रकम परिवारको पहुँचभन्दा बाहिर गइसकेको उहाँले बताउनुभयो। आफन्त टेरले भन्नुभयो, “हामीले परिवारको तर्फबाट भएसम्मको आफ्नो सम्पूर्ण बचत र सरसापट गरेर उपचारमा खर्च गरिसक्यौँ। अब अगाडिको क्रिटिकल उपचारका लागि थप रकम जुटाउन सक्ने अवस्था बिल्कुलै रहेन। तपाईं-हाम्रो सानो सहयोगले एउटा चेलीको ज्यान बच्न सक्छ, त्यसैले देश-विदेशमा रहनुहुने सम्पूर्ण नेपाली दाजुभाइ तथा दिदीबहिनीहरूलाई सहयोग गरिदिनुहुन म विनम्र अनुरोध गर्दछु।”

कलिलो उमेरमै ओछ्यान परेकी सपनालाई बचाउन र नयाँ जीवन दिएर घर फर्काउनका लागि परिवारले देश तथा विदेशमा रहेका सम्पूर्ण मनकारी, सहृदयी र दाता महानुभावहरूसमक्ष आर्थिक सहयोगको पुकार गरेको छ।