नेपाल वायुसेवा सञ्चालक संघ (बार्न) को अध्यक्षमा अनिल घिमिरे निर्वाचित भएका छन्। ललितपुरस्थित गोदावरी मा सम्पन्न संघको ३०औँ र ३१औँ वार्षिक साधारण सभाले सन् २०२६–२०२८ कार्यकालका लागि घिमिरेको नेतृत्वमा नयाँ कार्यसमिति सर्वसम्मत रूपमा चयन गरेको हो।
‘उत्थानशील आकाश, साझा दृष्टिकोण’ मूल नारासहित सम्पन्न साधारण सभाबाट प्रथम उपाध्यक्षमा भोला विक्रम थापा, द्वितीय उपाध्यक्षमा अवित श्रेष्ठ, महासचिवमा सारिक बोगटी र कोषाध्यक्षमा नवराज शाही चयन भएका छन्।
त्यस्तै, नेपालमा उडान भर्ने अन्तर्राष्ट्रिय वायुसेवाका तर्फबाट सेर्कान बासार, जुनु मलेकु, धिरज चन्द्र श्रेष्ठ, सन्तोष विक्रम राणा तथा तृप्ति क्षेत्री कार्यसमिति सदस्यमा चयन भएका छन्। अध्यक्ष घिमिरेले विधानअनुसार अफलाइन वायुसेवाको प्रतिनिधित्व गर्दै रमेश लामिछाने र बासु लामिछानेलाई कार्यसमिति सदस्यमा मनोनयन गरेका छन्।
साधारण सभामा अन्तर्राष्ट्रिय वायुसेवा क्षेत्रका प्रतिनिधिहरूले संघको वार्षिक प्रतिवेदन, वित्तीय अवस्था तथा हवाई उद्योगका चुनौती र अवसरबारे छलफल गरेका थिए।
सन् १९९० मा स्थापना भएको बार्न नेपालमा सञ्चालनमा रहेका अन्तर्राष्ट्रिय वायुसेवाहरूको छाता संगठन हो।
Discussion about this post