कञ्चनपुर । विश्व वातावरण दिवसको अवसर पारेर कञ्चनपुरको वेदकोट नगरपालिका वडा नम्बर १ मा ‘धुवाँका कारण स्वास्थ्य र वातावरणमा पर्ने असर’ विषयक सचेतनामूलक वक्तृत्वकला प्रतियोगिता तथा चित्रकला प्रदर्शनी कार्यक्रम भव्य रूपमा सम्पन्न भएको छ।
वेदकोट नगरपालिका वडा नम्बर १ स्थित श्री चन्द्र ज्योति ग्रामीण विद्युत सहकारीको सभागृहमा ‘धुवाँ मुक्त गाउँ अभियान कार्यक्रम’ अन्तर्गत उक्त विशेष कार्यक्रम आयोजना गरिएको हो। एसनभी नेपालका FRANKE परियोजना व्यवस्थापक आर्या शरद गौतमको अध्यक्षतामा सम्पन्न भएको उक्त कार्यक्रममा वेदकोट नगरपालिका वडा नम्बर १ का कार्यवाहक वडा अध्यक्ष विनोद विष्ट प्रमुख अतिथि रहनुभएको थियो।
वातावरण संरक्षण र मानव स्वास्थ्य सम्बन्धी सघन चेतना जगाउने उद्देश्यले आयोजित यस कार्यक्रममा वडा भित्रका गणेश आधारभूत विद्यालय, सिद्धनाथ आधारभूत विद्यालय र आस्थापुञ्ज एकेडेमी गरी ३ वटा विद्यालयका झण्डै १५० जना विद्यार्थी तथा स्थानीय सरोकारवालाहरूको उत्साहजनक सहभागिता रहेको थियो। उक्त विशेष कार्यक्रमको सञ्चालन संस्थाका क्षेत्र संयोजक शिवराज पनेरुले गर्नुभएको थियो।
यस पटकको कार्यक्रममा मुख्य आकर्षणका रूपमा वक्तृत्वकला प्रतियोगिताका साथै वातावरण दिवसको महत्त्व र वातावरणीय संवेदनशीलता झल्किने कलात्मक चित्रकला प्रदर्शनी (Art Gallery) समेत राखिएको थियो। जहाँ विभिन्न विद्यालयका झण्डै १२ जना विद्यार्थीहरूले वातावरण संरक्षण र धुवाँमुक्त समाजको सुन्दर परिकल्पना गरी तयार पारेका उत्कृष्ट चित्रहरू प्रदर्शनीमा राखेका थिए।
कार्यक्रममा बोल्दै प्रमुख अतिथि एवम् कार्यवाहक वडा अध्यक्ष विनोद विष्टले धुवाँयुक्त भान्साका कारण मानव स्वास्थ्य, विशेषगरी महिला र बालबालिकाको फोक्सो र श्वासप्रश्वासमा परिरहेको गम्भीर नकारात्मक असर र त्यसले वातावरणमा पुर्याएको दीर्घकालीन क्षतिबारे विस्तृत चर्चा गर्नुभयो। उहाँले परम्परागत चुल्होको विकल्पमा आधुनिक, विद्युतीय र वातावरणमैत्री प्रविधिको प्रयोग बढाएर गाउँलाई पूर्ण रूपमा धुवाँ मुक्त बनाउन यस्ता विद्यालय र समुदाय केन्द्रित चेतनामूलक अभियानहरू निकै प्रभावकारी हुने धारणा व्यक्त गर्नुभयो।
वक्तृत्वकला प्रतियोगितामा सहभागी विद्यार्थीहरूले धुवाँका कारण स्वास्थ्य र वातावरणमा परिरहेको बहुआयामिक असरबारे आ-आफ्ना तार्किक र चेतनामूलक भनाइहरू प्रस्तुत गरेका थिए भने उपस्थित स्थानीय बासिन्दा तथा सरोकारवालाहरूले यस ‘धुवाँ मुक्त गाउँ अभियान’ लाई व्यावहारिक रूपमै सफल पार्न आफ्नो तर्फबाट पूर्ण प्रतिबद्धता रहने बताएका छन्।
Discussion about this post