विश्व वातावरण दिवसको अवसरमा वेदकोटमा चित्रकला र वृक्षारोपण

कञ्चनपुर । विश्व वातावरण दिवसको अवसरमा कञ्चनपुरको वेदकोट नगरपालिकामा जलवायु सचेतना जगाउने उद्देश्यले नगरस्तरीय चित्रकला प्रतियोगिता तथा वृक्षारोपण कार्यक्रम सम्पन्न भएको छ।

“समृद्ध भविष्यको आधार: जलवायु एवम् प्रकृतिमैत्री विकास” भन्ने मूल नाराका साथ वेदकोट नगरपालिकाको आयोजना, नेपाल राष्ट्रिय समाज कल्याण संघ (एनएनएसडब्ल्यूए) र डीसीए नेपालको र वेदकोट नगरपालिका स्तरीय उत्थानशील युवा सञ्जालको समन्वय तथा सहकार्यमा उक्त कार्यक्रम आयोजना गरिएको हो।

वातावरण संरक्षण र पर्यावरणको महत्त्वलाई कलामार्फत प्रस्तुत गर्न आयोजित प्रतियोगितामा नगरभित्रका विभिन्न विद्यालयका १९ जना विद्यार्थीहरूले प्रतिस्पर्धा गरेका थिए। प्रतियोगितामा बैजनाथ माध्यमिक विद्यालय गैलनदीकी छात्रा अनुष्का फर्सवानले प्रथम स्थान हासिल गर्दै नगद दुई हजार रुपैयाँ पुरस्कार प्राप्त गर्नुभएको छ।

त्यसैगरी बैजनाथ माध्यमिक विद्यालय जडैपानीकी आरजु रानाले दोस्रो स्थान प्राप्त गर्दै नगद पन्ध्र सय रुपैयाँ र घटाल माध्यमिक विद्यालय सुडाकी श्रृष्टी भाटले तेस्रो स्थान हासिल गर्दै नगद पाँच सय रुपैयाँ पुरस्कार प्राप्त गर्नुभएको छ। प्रतियोगितामा सहभागी हुनुभएका अन्य सम्पूर्ण विद्यार्थीहरूलाई प्रोत्साहन स्वरूप सहभागीता प्रमाणपत्र प्रदान गरिएको थियो।

वेदकोट नगरपालिकाका नगर उपप्रमुख तुलसी जोशीले वातावरण जोगाउने जिम्मेवारी नयाँ पुस्ताको काँधमा रहेको बताउँदै विद्यालयस्तरबाटै यस्ता सचेतनामूलक कार्यक्रम गरिनु सराहनीय रहेको उल्लेख गर्नुभयो। त्यसैगरी प्रमुख प्रशासकीय अधिकृत हरि दत्त भट्टले विकास र प्रकृति बीचको सन्तुलन मिलाउन वृक्षारोपण र पर्यावरण संरक्षणको ठूलो महत्व रहेको कुरामा जोड दिनुभयो।

नेपाल राष्ट्रिय समाज कल्याण संघ (एनएनएसडब्ल्यूए) का संयोजक राज कुमार सुनारले वातावरण दिवसको नारालाई व्यवहारमा उतार्न र जलवायु अनुकूलनका कार्यहरूमा युवा तथा विद्यार्थीहरूको भूमिका महत्त्वपूर्ण हुने बताउनुभयो।कार्यक्रमको अवसरमा नगरपालिका परिसर तथा वरपरका क्षेत्रमा वृक्षारोपण समेत गरिएको थियो।

कार्यक्रमको सञ्चालन वेदकोट नगरपालिकाका विपद् सम्पर्क व्यक्ति सुनिल चन्दले गर्नुभएको थियो।