कञ्चनपुर । विश्व वातावरण दिवस-२०२६ कञ्चनपुरको भीमदत्त नगरपालिकामा पनि विभिन्न कार्यक्रमको आयोजना गरि मनाईएको छ। “समृद्ध भविष्यको आधारः जलवायु एवम् प्रकृतिमैत्री विकास” भन्ने मूल नाराका साथ भीमदत्त नगरपालिकामा विश्व वातावरण दिवस-२०२६ भव्य रूपमा मनाइएको हो।
भीमदत्त नगरपालिकाको आयोजना तथा वन डिभिजन कार्यालय कञ्चनपुर, नेपाल राष्ट्रिय समाज कल्याण संघ (एनएनएसडब्ल्यूए), डीसीए नेपाल, डब्ल्यूडब्ल्यूएफ, निड्स नेपाल, अक्स्फाम, पेसवान, प्रेक्टिकल एक्सन, र प्लान इन्टरनेशनल लगायतका साझेदार संस्थाहरू र सरोकारवाला निकायहरूको संयुक्त समन्वय एवम् सहकार्यमा विभिन्न चेतनामूलक कार्यक्रमहरू सम्पन्न भएका छन्।
दिवसको अवसरमा वातावरणीय सन्तुलन कायम राख्ने र हरित नगरको परिकल्पनालाई साकार पार्ने उद्देश्यले भीमदत्त बजार क्षेत्रमा बृहत् सरसफाई गरिएको छ। भीमदत्त नगरपालिकाको सडक छेउछाउ र स्थानीय इको पार्कमा व्यापक वृक्षारोपण तथा सरसफाई समेत गरिएको छ। सडकका किनाराहरूमा रोपिएका बिरुवाहरूले नगरको हरियाली, वातावरणीय संरक्षण साथै सौन्दर्यकरणमा ठूलो टेवा पुग्ने विश्वास लिइएको छ।
कार्यक्रमको विशेष आकर्षणको रूपमा भीमदत्त नगरपालिका स्तरीय उत्थानशील युवा सञ्जालले वातावरण संरक्षणको महत्त्वबारे चेतनामूलक सडक नाटक मञ्चन गरेको थियो। कार्यक्रमा वन डिभिजन कार्यालय कञ्चनपुरका प्रमुख लक्ष्मीराज जोशीले वन र वातावरणको संरक्षण केवल एउटा निकायको मात्र नभई सम्पूर्ण समुदायको साझा जिम्मेवारी भएको उल्लेख गर्नुभयो। उहाँले यस्ता वृक्षारोपण र पर्यावरणमैत्री अभियानहरूले भविष्यको पुस्ताका लागि प्राकृतिक स्रोत जोगाउन मद्दत पुग्ने विश्वास व्यक्त गर्नुभयो।
त्यस्तै भीमदत्त नगरपालिकाको वन वातावरण, फोहोरमैला तथा विपद् व्यवस्थापन शाखाका संयोजक प्रकाश थापाले नगरलाई हरित र सफा राख्न नगरपालिका निरन्तर लागिपरेको बताउँदै बजार क्षेत्रको फोहोर व्यवस्थापन र सडक छेउमा गरिएका वृक्षारोपणको संरक्षणका लागि स्थानीय नागरिकहरूको सक्रिय भूमिका र अपनत्व आवश्यक रहने कुरामा उहाँले जोड दिनुभयो।
नेपाल राष्ट्रिय समाज कल्याण संघ (एनएनएसडब्ल्युए) का संयोजक राज कुमार सुनारले सुदृढ परियोजना मार्फत नगरपालिका र अन्य साझेदार संस्थाहरूसँग मिलेर हरित नगरको अवधारणालाई व्यवहारमा उतार्न पाउनु सुखद रहेको बताउनुभयो। उहाँले जलवायु परिवर्तनको जोखिम न्यूनीकरण र वातावरणीय सन्तुलनका लागि वृक्षारोपण र सरसफाई अभियान मात्र नभई समुदायस्तरमै सचेतना जगाउनु आवश्यक रहेको औंल्याउँदै वातावरण संरक्षणका यस्ता हरेक महाअभियान र दिगो विकासका प्रयासहरूमा एनएनएसडब्ल्युए ले आगामी दिनमा पनि आफ्नो प्राविधिक तथा संस्थागत सहकार्यलाई अझ सघन र निरन्तर अगाडि बढाउने प्रतिबद्धता व्यक्त गर्नुभयो।
कार्यक्रमको सञ्चालन भीमदत्त नगरपालिकाका विपद् सम्पर्क व्यक्ति मनोज प्रसाद भट्टको सञ्चालन गर्नुभएको थियो।
उक्त कार्यक्रममा नेपाल प्रहरी (सुरक्षा निकाय), विभिन्न विद्यालयका शिक्षक तथा विद्यार्थीहरू, सुदूरपश्चिम विश्वविद्यालयका प्रतिनिधिहरू, उत्थानशील युवा सञ्जाल भीमदत्त नगरपालिका, स्थानीय सरोकारवाला तथा सर्वसाधारण नागरिकहरूको उत्साहजनक र सक्रिय सहभागिता रहेको थियो।
Discussion about this post