सडक विभागले सडक पूर्वाधार विकाससँगै वातावरणीय सन्तुलन र हरित प्रवर्द्धनलाई उच्च प्राथमिकतामा राख्ने प्रतिबद्धता व्यक्त गरेको छ ।
विश्व वातावरण दिवसको अवसरमा काठमाडौंमा आयोजित वृक्षारोपण कार्यक्रममा विभागका महानिर्देशक डा. विजय जैसीले विभागको कार्यक्षेत्र केवल सडक निर्माणमा सीमित नभई जलवायु अनुकूलन (क्लाइमेट रेजिलेन्स) र हरित मार्ग निर्माणमा केन्द्रित रहेको जानकारी दिए ।
उनले सडकका वरपर हरियाली प्रवर्द्धनका लागि विभागसँग आफ्नै कार्यविधि रहेको उल्लेख गर्दै विश्व बैंक र एसियाली विकास बैंक (एडीबी) जस्ता दातृ निकायहरूले पनि हरित सडक अवधारणालाई प्राथमिकतामा राखेको बताए ।
महानिर्देशक जैसीले भने, “सडक विभागले केवल भौतिक पूर्वाधार मात्र होइन, वातावरणलाई समेत ध्यान दिँदै जलवायु अनुकूलनका आधारमा हरित मार्ग निर्माण गर्ने संस्कृतिलाई अघि बढाउँदै आएको छ । यसलाई हामीले ‘केस स्टडी’का रूपमा अघि बढाएका छौँ ।”
यसैबीच, सडक डिभिजन काठमाडौंका प्रमुख तथा सिनियर डिभिजन इन्जिनियर सुवोधकुमार देवकोटाले विकास र वातावरणलाई परिपूरक रूपमा अघि बढाउनुपर्नेमा जोड दिए । उनका अनुसार अब निर्माण हुने प्रत्येक सडक आयोजनामा वातावरणमैत्री अवधारणा अनिवार्य रूपमा लागू गरिनेछ ।
कार्यक्रमअन्तर्गत आज मात्रै काठमाडौंका सडक क्षेत्रमा करिब २०० बिरुवा रोपिएको विभागले जनाएको छ । रोपिएका बिरुवाको संरक्षणको जिम्मेवारी पनि लिइएको छ ।
विश्व वातावरण दिवसको अवसरमा आयोजित यस कार्यक्रमले सडक पूर्वाधार र पर्यावरणबीच सन्तुलन कायम गर्दै दिगो विकास लक्ष्य हासिल गर्न महत्वपूर्ण योगदान पुर्याउने अपेक्षा गरिएको छ
Discussion about this post