काठमाडौं – नेपाली कांग्रेसमा हालसम्म ३ लाख ७५ हजार क्रियाशील सदस्यले मात्रै आफ्नो सदस्यता डिजिटल रूपमा अद्यावधिक गरेका छन्। महामन्त्री प्रदीप पौडेल नेतृत्वको क्रियाशील सदस्यता व्यवस्थापन समितिले सदस्यता नवीकरण गरेका कार्यकर्तालाई अनिवार्य रूपमा डिजिटल अद्यावधिक गर्न आग्रह गरेको थियो। सोही अभियानअन्तर्गत हालसम्म ३ लाख ७५ हजार सदस्यले प्रक्रिया पूरा गरेका हुन्।
समितिका सदस्य तथा सहमहामन्त्री प्रकाश स्नेही रसाइलीका अनुसार यो समाचार तयार पार्दासम्म ३ लाख ७५ हजार सदस्यले अद्यावधिक गरिसकेका छन् भने साँझसम्म यो संख्या ४ लाख पुग्ने अनुमान गरिएको छ। नेपाली कांग्रेसको १४औँ महाधिवेशनका बेला पार्टीमा ८ लाख ७० हजारभन्दा बढी क्रियाशील सदस्य थिए। अहिले डिजिटल अद्यावधिक गर्ने सदस्यको संख्या उल्लेखनीय रूपमा घटेको देखिएको छ।
सहमहामन्त्री रसाइलीका अनुसार अघिल्लो महाधिवेशनमा करिब २ लाख सरकारी कर्मचारी, शिक्षक तथा अन्य पेशागत क्षेत्रका व्यक्तिहरू सदस्य थिए। तर सरकारले सरकारी कर्मचारी र शिक्षकलाई कुनै पनि राजनीतिक दलको सदस्य बन्न नपाउने व्यवस्था गरेपछि स्वाभाविक रूपमा सदस्य संख्या घटेको हो। त्यसबाहेक पनि उल्लेख्य संख्यामा सदस्यहरूले आफ्नो सदस्यता अद्यावधिक नगरेको समितिको भनाइ छ।
गत पुस अन्तिम साता सम्पन्न विशेष महाधिवेशनपछि कांग्रेसभित्र नेतृत्व र संगठनात्मक विषयमा विवाद जारी छ। विशेष महाधिवेशनले गगन थापाको नेतृत्वमा नयाँ कार्यसमिति गठन गरेको थियो। सोही कार्यसमितिले गठन गरेको क्रियाशील सदस्यता व्यवस्थापन समितिले १५औँ महाधिवेशनका लागि सदस्यता नवीकरण गरेका सबै सदस्यले डिजिटल अद्यावधिक गर्नुपर्ने व्यवस्था लागू गरेको छ। तर निवर्तमान सभापति शेरबहादुर देउवा पक्षले उक्त प्रक्रियाप्रति असहमति जनाउँदै अद्यावधिक नगर्ने अडान कायम राखेको बताइएको छ।
विशेष महाधिवेशनअघि नै करिब ४ लाख ५० हजार सदस्यले क्रियाशील सदस्यता नवीकरण गरेका थिए। समितिका अनुसार तीमध्ये हालसम्म ३ लाख ७५ हजार सदस्यले मात्रै डिजिटल अद्यावधिक प्रक्रिया पूरा गरेका छन्।
Discussion about this post