काठमाडौं – देशका विभिन्न जिल्लामा अहिले वर्षा भइरहेको छ। कास्की, लमजुङ, गोरखा र धादिङसहितका क्षेत्रमा सक्रिय वर्षा जारी रहेको छ भने पछिल्लो तीन घण्टामा लमजुङको भुजुङमा झण्डै ३२ मिलिमिटर वर्षा मापन भएको छ।
जल तथा मौसम पूर्वानुमान महाशाखाका अनुसार आज दिउँसो गण्डकीसहित कोशी र बागमती प्रदेशका केही स्थानहरूमा तथा मधेश, लुम्बिनी, कर्णाली र सुदूरपश्चिम प्रदेशका पहाडी तथा हिमाली भेगका थोरै स्थानमा मेघगर्जन र चट्याङ्गसहित वर्षाको सम्भावना रहेको छ।
महाशाखाले आज र भोलि विशेषगरी कोशी र गण्डकी प्रदेशका केही ठाउँमा भारी वर्षा हुन सक्ने जनाएको छ। साथै, तराई क्षेत्रमा पछिल्ला दिनहरूमा बढिरहेको तापक्रम आज केही घट्ने अनुमान गरिएको छ। तराईका केही स्थानमा आंशिकदेखि सामान्य बदली रही हल्का वर्षाको सम्भावना रहेको छ, जसले गर्मी कम गर्न सहयोग पुग्ने अपेक्षा गरिएको छ।
वर्षासँगै चट्याङ्ग पर्ने जोखिम र उच्च हिमाली क्षेत्रमा हिमपातको समेत सम्भावना रहेकाले सतर्कता अपनाउन महाशाखाले सर्वसाधारणलाई आग्रह गरेको छ।
Discussion about this post