काठमाडौं – सरकारले यही वैशाख १७ गतेका लागि आह्वान गरिएको सङ्घीय संसद्को अधिवेशन रोक्न राष्ट्रपतिको कार्यालयमा पत्र पठाएको छ। सरकारको सिफारिसमा राष्ट्रपति रामचन्द्र पौडेलले वैशाख ९ गते सङ्घीय संसद्को अधिवेशन आह्वान गर्नुभएको थियो। तर वैशाख १० गते सरकारले पुनः पत्राचार गर्दै उक्त अधिवेशन रोक्न आग्रह गरेको हो।
राष्ट्रपतिको सचिवालयका अनुसार अधिवेशन रोक्नेबारे पत्र प्राप्त भए पनि पुनः कहिले अधिवेशन आह्वान गर्ने भन्ने मिति उल्लेख गरिएको छैन। सचिवालयका एक पदाधिकारीका अनुसार अपराह्नतिर अधिवेशन स्थगित गर्न अनुरोधसहितको पत्र प्राप्त भएको हो।
यद्यपि राष्ट्रपतिको कार्यालयले अहिलेसम्म औपचारिक रूपमा अधिवेशन स्थगनको निर्णय भने गरिसकेको छैन। यसअघि मन्त्रिपरिषद्को वैशाख ८ गतेको सिफारिसका आधारमा अधिवेशन आह्वान गरिएको थियो।
Discussion about this post