काठमाडौं – नयाँ शैक्षिक सत्र सुरु गर्ने समय, भर्ना अभियान र साप्ताहिक बिदाबारे संघीय सरकार र स्थानीय तहबीच देखिएको मतभेदका कारण देशभरका विद्यालयमा अन्योल सिर्जना भएको छ । सरकारका निर्णय र निर्देशनका कारण अभिभावकदेखि विद्यार्थी, शिक्षक र विद्यालय सञ्चालकसम्म अन्योलमा परेका छन् ।
संघीय सरकारले वैशाख १५ गतेदेखि नयाँ शैक्षिक सत्र सुरु गर्ने, १५ देखि २१ गतेसम्म भर्ना अभियान सञ्चालन गर्ने र वैशाख २१ गतेदेखि मात्र पठनपाठन सुरु गर्ने निर्णय गरेको छ । साथै शनिबार र आइतबार दुई दिन सार्वजनिक बिदा दिने व्यवस्था पनि लागू गर्न निर्देशन दिइएको छ । तर, यो निर्णय कार्यान्वयनमा देशभर एकरूपता देखिएको छैन ।
संविधानअनुसार विद्यालय शिक्षाको अधिकार स्थानीय तहमा रहे पनि संघीय सरकारको नीतिगत निर्देशनसँग तालमेल नमिल्दा समस्या देखिएको हो । धेरै स्थानीय तहले आफ्नै शैक्षिक क्यालेण्डरअनुसार भर्ना र कक्षा सञ्चालन गरिरहेका छन् । कतिपयले वैशाख २ गतेदेखि नै भर्ना अभियान सुरु गरेका छन् भने केहीले वैशाख ७ गतेबाटै पठनपाठन थालेका छन् ।
यसैबीच, संस्थागत विद्यालयहरूले विभिन्न शीर्षकमा शुल्क लिइरहेको भन्दै अभिभावकहरूले गुनासो गरेका छन् । सरकारको निर्देशन विपरीत भर्ना शुल्क र अन्य शुल्क उठाइएको उनीहरूको आरोप छ । तर निजी विद्यालयसँग सम्बन्धित संघसंस्थाहरूले भने शुल्क कानुनअनुसार नै लिइएको दाबी गरेका छन् । उनीहरूका अनुसार शिक्षक, कर्मचारी, पूर्वाधार र सञ्चालन खर्च धान्न शुल्क अपरिहार्य छ ।
शिक्षा, विज्ञान तथा प्रविधि मन्त्रालयले भने मन्त्रिपरिषद्को निर्णय कार्यान्वयनमा जोड दिएको छ । शिक्षा तथा मानव स्रोत विकास केन्द्रले विद्यालयहरूलाई नयाँ शैक्षिक सत्रअनुसार योजना, कार्यतालिका र शिक्षक क्षमता विकास कार्यक्रम तयार गर्न निर्देशन दिएको छ ।
यस्तै, केन्द्रले विद्यार्थीहरूलाई अतिरिक्त बोझ हुने पाठ्यपुस्तक प्रयोग नगर्न र विद्यालयभित्र पोसाक तथा स्टेशनरी बिक्री–वितरण नगर्न पनि निर्देशन दिएको छ ।
नगरपालिका संघ र गाउँपालिका महासंघले भने स्थानीय तहलाई आफ्नै आवश्यकता र परिवेशअनुसार भर्ना तथा पठनपाठन सञ्चालन गर्न आग्रह गरेका छन् । उनीहरूले संविधानले दिएको अधिकारअनुसार शैक्षिक गतिविधि अघि बढाउन सर्कुलर जारी गरेका छन् ।
संघ र स्थानीय तहका फरकफरक निर्णयका कारण अभिभावकहरू सबैभन्दा बढी प्रभावित भएका छन् । भर्ना कहिले गर्ने र कक्षा कहिलेदेखि सुरु हुन्छ भन्ने स्पष्ट जानकारी नहुँदा उनीहरू अन्योलमा परेका छन् ।
Discussion about this post