नेपालगञ्ज — पाँच बुँदे सार्वजनिक प्रतिबद्धतासहित जानकी गाउँपालिकाले सार्वजनिक सुनुवाइ कार्यक्रम सम्पन्न गरेको छ।
जानकी गाउँपालिकाको आयोजना तथा बास नेपालको सहजीकरणमा गाउँपालिका परिसरमा आयोजित उक्त कार्यक्रममा चालु आर्थिक वर्षको दोस्रो चौमासिकभित्र प्रदान गरिएका सेवा–सुविधाको प्रभावकारिताबारे समीक्षा गरिएको थियो।
कार्यक्रममा गाउँपालिकाले आगामी दिनमा कार्यान्वयन गर्ने गरी विभिन्न पाँच बुँदे प्रतिबद्धता सार्वजनिक गरेको छ। जसअन्तर्गत शैक्षिक अनुदान तथा सुधारका कार्यक्रमलाई थप व्यवस्थित र पारदर्शी बनाउने, स्थानीय पाठ्यक्रममा स्थानीय भाषा समावेश गर्ने, वडा नं. ३ मा रहेको गौशालालाई व्यवस्थापन गर्ने लगायतका विषय समेटिएका छन्।
यस्तै, वडा नं. ३ को वन्जाडे गाउँमा कृषि सिँचाइका लागि विद्युत पोल जडान प्रक्रिया अगाडि बढाउने, वडा नं. ४ मा देखिएको खानेपानी समस्या समाधान गर्ने तथा लक्षित वर्ग उत्थान कार्यक्रमलाई थप पारदर्शी र प्रभावकारी बनाउँदै आगामी आर्थिक वर्षमा बजेट वृद्धि गर्ने प्रतिबद्धता समेत जनाइएको छ।
करिब एक घण्टा लामो खुला छलफलमा गाउँपालिका अध्यक्ष छब्बन खाँ प्रमुख सरोकारवाला व्यक्तिका रूपमा सहभागी रहेका थिए। साथै उपाध्यक्ष रामप्यारी यादव, प्रमुख प्रशासकीय अधिकृत परशुराम उपाध्याय, वडा अध्यक्षहरू, कार्यपालिका सदस्य तथा शाखा प्रमुखहरूको उपस्थिति रहेको थियो।
छलफलका क्रममा सहभागीहरूले विकास निर्माणमा ढिलासुस्ती, शिक्षा र स्वास्थ्य क्षेत्रमा देखिएका समस्या तथा लक्षित वर्ग उत्थान कार्यक्रम प्रभावकारी हुन नसकेको भन्दै असन्तुष्टि व्यक्त गरेका थिए। सहभागीहरूमा अनिल मिश्र, रसिद अहमद राई, राजन बर्मा, मोहन बिष्ट, कमलेश कुमार मिश्र, रामानन्द तमोली र धर्म गोडिया लगायत रहेका थिए।
कार्यक्रममा प्रमुख प्रशासकीय अधिकृत परशुराम उपाध्यायले प्रगति प्रतिवेदन प्रस्तुत गरेका थिए। बास नेपालका कार्यक्रम प्रबन्धक मन भण्डारीले स्वागत मन्तव्यसहित नागरिक तथा बहिर्गमन प्रतिवेदन प्रस्तुत गरेका थिए भने निर्देशक हेमराज भट्टले सार्वजनिक प्रतिबद्धता वाचन गरेका थिए। कार्यक्रमको सहजीकरण बास नेपालका केन्द्रीय अध्यक्ष शिवकुमार बर्माले गरेका थिए।
Discussion about this post